Yandex Go Ўзбекистонда янги хавфсизлик функциясини ишга туширди
Yandex Go хизмати Ўзбекистонда ҳайдаш манёврини назорат қилиш бўйича янги хавфсизлик функциясини ишга туширди. Aгар ҳайдовчи мунтазам равишда қаттиқ «тормоз» берса ёки жуда тез ҳаракатланса, тизим унга секинроқ ҳайдаш учун огоҳлантириш юборади. Шунингдек, ҳайдовчи ҳайдаш услубини ўзгартирмаса, тизим унинг буюртмаларга киришини чеклаши мумкин
Yandex Go хизмати Ўзбекистонда янги хавфсизлик функцияси — ҳайдаш манёврини назорат қилишни ишга туширди. Бу ҳақда компания Kommers.uz’га маълум қилди.
Қайд этилишича, махсус моделлар ҳайдовчи иловасида акселерометрдан олинган маълумотларни қайта ишлайди ва манёврларнинг силлиқлигини баҳолайди. Aгар ҳайдовчи мунтазам равишда қаттиқ «тормоз» берса, бўлакларни ўзгартирса ёки жуда тез ҳаракатланса, тизим унга секинроқ ҳайдаш учун огоҳлантириш юборади. Шунингдек, ҳайдовчи ҳайдаш услубини ўзгартирмаса, тизим унинг буюртмаларга киришини чеклаши мумкин.
Yandex Go биринчи натижаларни сарҳисоб қилган. Унга кўра, тизимли равишда кескин манёврларни амалга оширувчи ҳайдовчилар улуши икки баравар камайган.
Шунингдек, келгусида ҳайдовчилар ва йўловчиларни қўшимча бепул суғурта қилиш тизими ҳам режалаштирилган.
Маълумот учун, Yandex Go Ўзбекистонда 2018 йилнинг апрель ойида ишга туширилган. Хизмат 7 та шаҳарда: Тошкент, Фарғона, Бухоро, Марғилон, Наманган, Aндижон ва Самарқандда ишлайди. Yandex Go’нинг ўз ҳайдовчилари ва машиналари йўқ. Хизмат маҳаллий ташувчилар билан ҳамкорлик қилади. Бепул илова IOS ва Android учун ўзбек, рус ва бошқа кўплаб тилларда мавжуд.
