Японияда ишламоқчи бўлган ўзбекистонликлар «Махсус малака сертификати»ни Японияга бормасдан қўлга киритишлари мумкин. Бу ҳақда АОКАда ўтказилган брифингда маълум қилинди.

Қайд этилишича, Ўзбекистон Бандлик ва меҳнат муносабатлари вазирлиги ҳамда Япониянинг Адлия, Соғлиқни сақлаш, Меҳнат ва фаровонлик, Ташқи ишлар вазирликлари ҳамда Япония миллий полиция агентлиги ўртасида ҳамкорлик меморандуми имзоланган.

Мазкур ҳужжатда Ўзбекистон фуқароларни Японияда талаб юқори бўлган 14 та соҳада махсус малака кўникмалари ва япон тилини ўрганган ҳолда фаолият қилишлари борасида ҳамкорлик қилишга келишилган.

Шунингдек, Япониянинг Адлия вазирлиги ва Ўзбекистон Бандлик ва меҳнат муносабатлари вазирлиги билан ҳамкорликда Махсус малакали ишчиларни Японияга жўнатиш механизми ишлаб чиқилди.

Таъкидланишича, Японияда ишлашни истаган фуқаролар Японияда ишлаш ҳуқуқини берувчи «Махсус малака сертификати»ни Японияга бормасдан туриб Ўзбекистон ҳудудида қўлга киритиш имкониятига эга бўлди.

Япония ҳукумати Махсус малакали ишчи мақомини тасдиқловчи тестларни Ўзбекистонда ўтказилишини расман тасдиқлади. Бунга кўра МДҲ давлатлари ичида илк бор Япония ҳукумати томонидан амалга ошириладиган Tokuteiginou тестлари Ўзбекистонда амалга оширилади.

Мазкур тестларнинг Ўзбекистонда ўтказилиши Японияда ишлашни истаган фуқаролар учун харажатларни қисқартириш билан биргаликда, Япония меҳнат бозорида ўзбекистонлик меҳнат мигрантларини салоҳиятини танитишга ва Ўзбекистон сегментини яратишга кўмак беради.

Шунингдек, Бандлик ва меҳнат муносабатлари вазирлигининг бандлик жамғармаси ҳисобида Японияга боришни истаган ишсиз ва иш қидираётган фуқароларни япон тили, қарияларни парваришлаш ва қишлоқ хўжалиги соҳаси бўйича касбга бепул ўқитиш тизими ишга туширилди.

Бунинг учун Японияда ишлашни истовчилар ўз ҳудудларидаги бандлик бошқармаларига бориб Мономарказларда қарияларни парваришлаш ёки қишлоқ хўжалиги ва япон тили бўйича ўқиш учун йўлланма олиб келиши ва Ташқи меҳнат миграциясининг Labour migration дастуридан рўйхатдан ўтиши керак булади.

Аввалроқ Ўзбекистон меҳнат бозорида қайси соҳа мутахассисларига талаб юқорилиги хабар қилинганди. Шунингдек, Кореянинг ўзбекистонлик меҳнат мигрантлари учун квота ва шартномалари кескин камайгани ҳақида хабар берилди.