«Жаҳондаги вазият Ўзбекистонда инфляция даражасининг ортишига олиб келади» — Fitch Ratings
Ўзбекистоннинг реал иқтисодий ўсиш суръати 2022 йил 3,1 фоизни ташкил қилади.
Жаҳонда юзага келган вазият Ўзбекистонда инфляция даражасининг ортишига олиб келади. Fitch Ratings халқаро рейтинг агентлиги Ўзбекистоннинг суверен кредит рейтинги бўйича навбатдаги ҳисоботини чоп этди.
Ҳисоботга кўра, Ўзбекистон суверен кредит рейтингининг баҳоси ВВ- (барқарор кутилма) даражада тасдиқланди. Қайд этилишича, жаҳонда юзага келган вазият Ўзбекистонда иқтисодий ўсишнинг пасайишига, 2022–2023 йилларда жорий операциялар ҳисоби дефицити ва инфляция даражасининг ортишига олиб келади.
Агентликнинг янгиланган прогнозига кўра, 2022 йилда Ўзбекистоннинг реал иқтисодий ўсиш суръати 3,1 фоизни ташкил қилади.
Мазкур прогноз пул ўтказмалари камайиши туфайли уй хўжаликлари истеъмолининг камайиши, инвестиция лойиҳаларининг кечикиши, ташқи қарз жалб қилиш шартларининг қатъийлашиши, валютанинг кўпроқ қадрсизланиши ва юқорироқ инфляция кутилмалари билан изоҳланган.