Жеф Безос эко-энергия манбалари учун Рокфеллер фонди ва IKEA’га 500 млн доллар ажратади
IKEA хайрия бўлими ва Рокфеллер жамғармаси июнь ойида қўшма фонд тузилишини эълон қилганди
Amazon асосчиси Жефф Безоснинг The Bezos Earth Fund жамғармаси Рокфеллер фониди ва IKEA’нинг қўшма қайта тикланадиган энергия ташаббусига 500 миллион доллар хайрия қилади. Бу ҳақда Financial Times хабар бермоқда.
IKEA хайрия бўлими ва Рокфеллер жамғармаси июнь ойида қўшма фонд тузилишини эълон қилди. 2021 йил охирига қадар улар халқаро ташкилотлардан жамғармага 10 миллиард доллар жалб этиш ва кейинчалик институционал инвесторларга эшик очишни режалаштирган.
Жаҳон банки, Осиё тараққиёт банки ва АҚШ Халқаро тараққиёт молия корпорацияси каби халқаро банклар ва ривожланиш агентликлари фондга аллақачон 8 миллиард доллардан кўпроқ маблағ ажратишга ваъда берди.
«Янги жамғарма 10 йил давомида жами 100 миллиард долларгача маблағ йиғиш ва глобал карбонат ангидрид чиқиндиларини 4 миллиард тоннага камайтиришни режалаштирмоқда», — деди IKEA фонди бош директори Пер Хеггенес FT нашрига.
Жамғарма Глазгода бўлиб ўтадиган БМТнинг иқлим конференциясида расман ишга туширилади. Унинг мақсади Осиё, Африка ва Лотин Америкасидаги 1 миллиард аҳолини қайта тикланадиган манбалардан энергия билан таъминлашдан иборат. IKEA, Рокфеллер ва Безос жамғармаларининг пуллари хусусий инвесторларни жалб қилиш учун хавф капитали сифатида ишлатилади.
Аввалроқ Tesla акциялари 7 фоиз пастлагани ҳақида хабар берилганди.
