Қорақалпоғистоннинг Қозоғистон билан чегара қисмида жойлашган Қозоғистон—Ўзбекистон чегара ўтказиш пункти яна 4 ойга ёпилди. Бу ҳақда Қозоғистон Молия вазирлиги ҳузуридаги Давлат божхона қўмитасига таяниб, Казинформ агентлиги хабар берди.

Ўзбекистон ваколатли органлари билан келишилган ҳолда жисмоний шахслар, енгил автомобиллар, автобуслар ва юк кўтариш қуввати 3,5 тоннагача бўлган автотранспорт воситалари учун Тажен назорат-ўтказиш пункти орқали ҳаракатланиш вақтинча тўхтатилди.

«Бу қарор ўтказиш пунктида фуқаролар хавфсизлигини таъминлаш, қурилиш ва реконструкция ишларини жадаллаштириш мақсадида қабул қилинди. Ҳозирда ҳудудда кенг кўламли ишлар — металл конструкцияларни ўрнатиш, муҳандислик тармоқларини ётқизиш ва биноларни капитал таъмирлаш олиб борилмоқда», — дейилади хабарда.

Бундан ташқари, май—август ойларида КазАвтоЖол компанияси Тажен (Қозоғистон) ва Довут ота (Ўзбекистон) пунктлари ўртасидаги нейтрал полосада автомобиль йўлини қуради. Худди шундай ишлар Ўзбекистон томонидан ҳам амалга оширилиши режалаштирилган.

Қурилиш ишлари давом этаётгани муносабати билан Қозоғистон Ўзбекистон томонига чегарани кесиб ўтишга қўйилган чекловни яна 4 ойга — жорий йилнинг 1 сентябригача узайтириш таклифи билан расман мурожаат қилган. Қайд этилишича, Ўзбекистон бу ташаббусни қўллаб-қувватлаган.

Бундан ташқари, фуқаролардан саёҳат ва йўналишларни режалаштиришда ушбу маълумотларни инобатга олиш сўралган.