2024-yilning 9 oyida O‘zbekistondagi qaysi onlayn to‘lov tizimi eng yuqori daromadga erishdi?
2024-yilning uchinchi choragi yakunlariga ko‘ra, O‘zbekistondagi to‘lov tizimlari orasida Paynet, PayMe va Click olingan sof daromadi bo‘yicha yetakchilik qilmoqda. Mazkur davrda PayMe Click’ni ortda qoldirib, ikkinchi o‘ringa ko‘tarilgan bo’lsa, sof foydasini 96 foizga ko‘paytirgan Paynet bozordagi peshqadamlikni mustahkamladi.
2024-yilning dastlabki to‘qqiz oyi davomida qaysi elektron to‘lov tizimi boshqalariga nisbatan yuqori daromadga erishgani ma’lum qilindi.
Hisob-kitoblarga ko‘ra, Payme sof foyda ko‘rsatkichi bo‘yicha Click’ni ortda qoldirib, 186,9 milliard so‘m daromadga erishgan. Click esa 179,2 milliard so‘m sof foyda qilgan. Click’ning umumiy daromadi Payme’ga nisbatan qariyb 79 milliard so‘mga ko‘proq bo‘lsa-da, uning xarajatlari miqdori baland bo‘lgani hisobiga sof daromadi kamroq. Payme xarajatlarini samarali boshqarish orqali sof foyda bo‘yicha Click’dan o‘zib ketgan.
Sektor yetakchisi Paynet esa 2024-yil davomida o‘z pozitsiyasini mustahkamlab, sof foydasini 96 foizga oshirishga erishgan va jami 208,4 milliard so‘mga yetkazgan.
Yetakchi uchlikdan tashqari, boshqa fintech kompaniyalarning moliyaviy ko‘rsatkichlari nisbatan pastroq. Masalan, Plum to‘qqiz oy davomida 78,1 milliard so‘m, Alif Mobi esa 42,4 milliard so‘m daromad qilgan. UPay bo‘lsa 1,4 milliard so‘mlik daromad bilan yilni yakunlagan.
Aksincha, ayrim fintech kompaniyalar, masalan, Payze, Real Pay, DPay, Yuz Pay, Xon Pay va boshqalar uchinchi chorakni zarar bilan yakunlagan.
