Стратегик ислоҳотлар агентлиги томонидан нақд пульсиз ҳисоб-китоблар улушини ошириш бўйича Комплекс режа лойиҳасини ишлаб чиқиш учун «бир қатор хорижий компаниялар вакиллари билан учрашув» ўтказилиб, унда чекловларни бартараф этиш ва нақд пульсиз ҳисоб-китобларни рағбатлантириш бўйича таклифлар муҳокама қилинди.

Йиғилишда норасмий йўл билан олиб келинган товарлар кўпинча бозорларда намойиш этилаётган маҳсулотларга нисбатан арзонроқ нархда сотилаётгани таъкидланди.

Муаммонинг ечими сифатида норасмий импорт устидан назоратни кучайтириш ёки уларни электрон платформаларда сотишни қонунийлаштириш таклиф этилди.

Бошқа мавзу — нақд пулсиз тўловлар улушини тўғри ҳисоблаш масаласи. Айниқса, банк карталари орқали амалга оширилаётган барча операцияларни, жумладан p2p ўтказмаларини ҳам ҳисобга олиш зарурлиги алоҳида таъкидланди.

Учрашувда жисмоний шахсларнинг картадан картага пул ўтказмаларини нақд пулсиз ҳисоб-китоблар статистикасига киритишнинг махсус механизмини ишлаб чиқиш таклифи илгари сурилди.

Шунингдек, миллий тўлов тизимлари — Uzcard ва Humo комиссияларининг амалдаги тузилмаси банкларнинг мотивациясига таъсири муҳокама қилинди. Шундай қилиб, миллий операторларнинг карталари бўйича операциялар учун банкларнинг мукофотлари халқаро тўлов тизимлари шартларидан ортда қолмоқда.

Шу боис банклар учун шароит ҳамда рағбатларни миллий ва халқаро тизимлар бўйича тенглаштириш таклифи билдирилди.

Бундан ташқари, йиғилиш иштирокчилари «Тўловлар ва тўлов тизимлари тўғрисида»ги қонундаги бир қатор таъриф ва атамалар эскирганини, аниқ талқинлар ва тариф ёндашувларининг йўқлиги нақд пулсиз инфратузилмани ривожлантиришни қийинлаштираётганини таъкидладилар.

Шу муносабат билан қонунга маҳаллий ва хорижий тўлов операторлари ҳамда ташкилотлари томонидан воситачилик ҳақларини белгилаш меъёрларини, шунингдек, чегаралар оша тўловлар бўйича хизматлар кўрсатиш ва молиявий хизматлар билан боғлиқ операциялар ҳақида маълумот алмашиш тартибини аниқлаш юзасидан бир қатор ўзгартиришлар киритиш кўзда тутилмоқда.