Ўзбекистон жисмоний шахслардан олинадиган даромад солиғи (ЖШДС) бўйича прогрессив шкалага ўтиши зарур. Ҳозирда бу солиқ ставкаси 12% миқдорида белгиланган. Бу ҳақда Халқаро валюта жамғармасининг (ХВЖ) хабарида маълум қилинган.

Ташкилот Ўзбекистонга солиқ базасини кенгайтириш ва солиқ тушумларининг ЯИМга нисбатини камайтириш тенденциясини ортга қайтаришни тавсия қилди.

«2025 йилги буджет умуман олганда солиқ имтиёзларини кенгайтиради ва мавжудларини узайтиради. Бу эса солиқ базасининг ўсишини секинлаштиради ҳамда солиқ тушумларининг ЯИМга мутаносиб равишда ўсиш имкониятини чеклайди», дея таъкидланади ҳисоботда.

ХВЖ ҳукуматга келгуси уч йил мобайнида даромадларни оширишнинг ўрта муддатли стратегиясини ишлаб чиқишни ва солиқ тизимини янада адолатлироқ қилишни маслаҳат берди. Хусусан, бу 2020 йилдан бошлаб ялпи ички маҳсулотнинг 2%лик нуқтаси йўқотилишини қоплашга кўмаклашади.

ХВЖнинг техник ёрдам бўйича тавсияларида қуйидаги таклифлар мавжуд:

• инвестиция имтиёзларини қисқартириш;
• даромадларга асосланган солиқ имтиёзлари ва фойда солиғидан озод қилишни қайта кўриб чиқиш;
• божхона божлари бўйича самарасиз имтиёзларни бекор қилиш ва янги енгилликлар беришни тўхтатиш.

«Солиқ тизимини янада адолатли қилиш учун даромад солиғининг жорий текис ставкасини прогрессив ставкага алмаштириш керак», — дея хулоса қилди ХВЖ.

2024 йил май ойида Солиқ қўмитасининг стратегик режалаштириш бошқармаси бошлиғи Тимур Исмоилов Ўзбекистонда жисмоний шахслардан олинадиган даромад солиғини (ЖШДС) прогрессив шкалага қайтариш мумкинлигини билдирганди. У ўшанда солиққа тортишнинг текис шкаласидан воз кечиш учун «мустаҳкам солиқ тизимини шакллантириш» зарурлигини таъкидлаган ва аксарият хорижий мамлакатларда прогрессив тизим қўлланилаётганини қайд этган эди.