Ўзбекистон Марказий банки тўрт ойлик сотувлар сериясидан кейин июнь ойида 9 тонналик кўрсаткич билан олтиннинг энг йирик харидори бўлди. Бу ҳақда Жаҳон олтин кенгаши хабар берди.

Халқаро валюта жамғармаси ва бошқа очиқ маълумотларга кўра, марказий банклар июнь ойида 22 тонна соф харидларни амалга оширган. Олтинга бўлган талаб кетма-кет учинчи ой аста ўсиб келмоқда.

Йилнинг биринчи ярмида марказий банклар 123 тонна соф харидларни амалга оширган. Бу ўтган йилнинг мос даврига нисбатан бир оз камроқ (2024 йилнинг шу даврида 130 тонна бўлган).

Июнь ойида Қозоғистон Миллий банки иккинчи энг йирик олтин харидори бўлган, бошқа мамлакатлар нисбатан камроқ олтин сотиб олган. Сингапур Монетар бошқармаси (мамлакатда Марказий банк вазифасини бажаради) июнь ойида 6 тонна сотди.

Йил бошидан бери энг йирик соф харидорлар Полша Миллий банки (67 т), Озарбайжон (СОФАЗ, 35 т) ва Қозоғистон Миллий банки (22 т) бўлиб турибди.

Энг йирик сотувчи эса Ўзбекистон Марказий банки ҳисобланади (-18 тонна). Жумладан, мамлакат Марказий банки январь ойида 8 тонна олтин харид қилган, февралда 12 тонна, мартда 11 тонна, апрелда 11 тонна, майда 1 тонна олтин сотган, июнда 9 тонна олтин сотиб олган.