Ўзбекистондаги энг йирик АЁҚШлар тармоғи бўлмиш Carvon (собиқ UNG Petro) шохобчаларида 13 августдан бошлаб АИ-80 маркали бензин оширилган нархда – 1 литри 9100 сўмдан сотиляпти.

«Автострада»нинг ёзишича, айни пайтда йирик АЁҚШларда нархлар қуйидагича:

Ўтган йили ноябрда Рақобат қўмитаси томонидан биржада АИ-80 бензинига бошланғич нархдан 5 фоизлик спред киритилган эди. Бу чеклов 10 июндан бошлаб бекор қилингач, биржа савдоларида бу маҳсулот нархи кескин оша бошлади. Хусусан, 31 июл кунги савдоларда ўртача нарх 10 млн 937 минг сўмгача чиқди. Бу – спред амал қилган сўнгги кун 9 июндаги ўртача нарх (9 млн 459 минг сўм)дан 15,6 фоизга юқори.

Аввалроқ, Рақобат қўмитаси бошқарма бошлиғи Улуғбек Давлетов бу қимматлашишга изоҳ бераркан, биржадаги ошишга қарамай, чакана нархларда ўзгариш бўлмаётганини айтганди. Спреднинг олиб ташланиши эса яширин иқтисодиётни келтириб чиқараётгани билан изоҳланганди. Шунингдек, Рақобат қўмитаси расмийси АИ-80 бензинининг АЁҚШлардаги нархи ошган тақдирда, спредни қайтариш масаласи кун тартибига олиб чиқилишини ҳам маълум қилганди.

Россия ички бозорда ёқилғи нархининг кескин қимматлашиши фонида бензин экспортига тақиқни ёз охиригача кучайтирганди. Энергетика вазирлиги эса бу чеклов Ўзбекистонга тааллуқли эмаслигини билдирган эди.

АИ-80 нархи ошиши

2024 йил 1 январдан бошлаб, акциз солиғи бўйича имтиёз бекор қилингач, АИ-80 бензини нархи 6050 сўмдан 6800 сўмгача ошганди. Жорий йил 1 январидан эса нархлар бирданига 18,1 фоизга қимматлаб, 1 литр учун 6900 сўмдан 8150 сўмгача кўтарилганди. Шу тариқа, охирги 17 ой ичида АИ-80 баҳоси 50,4 фоизга қимматлашди.

Маълумот учун, Ўзбекистонда сентябр ойидан бошлаб АИ-80 ишлаб чиқарилишини буткул тўхтатиш режалаштирилган.