«Якка тартибдаги тадбиркорлар ҳамда ўзини ўзи банд қилган шахслар учун қулай шарт-шароит яратиш чора-тадбирлари тўғрисида»ги президент қарорига кўра, 2026 йил 1 январдан ЯТТ ва ўзини ўзи банд қилган шахсларда рақамли платформаларда генерация қилинган электрон тўловларни қабул қилувчи махсус QR-код мавжуд бўлиши мажбурий этиб белгиланди.

Махсус QR-код мавжуд эмаслиги назорат-касса техникасини ва ҳисоб-китоб терминалларини қўлламасликка тенглаштирилади.

Рақамли платформалар орқали берилган харид чекларига нисбатан жисмоний шахсларга кешбэк қайтариш тартиби қўлланилмайди.

ЯТТ ва ўзини ўзи банд қилган шахсларга кредитлар олишда қулайлик яратиш мақсадида рақамли платформалардаги пул айланмалари тўғрисидаги маълумотлар кредит бюроларига киритилади.

Апрель ойида Марказий банк Ўзбекистонда нақд пульсиз ҳисоб-китобларда универсал тўлов QR-кодини яратишни режалаштираётгани ҳақида хабар берилганди. Маълумотларга кўра, 2024 йилда индивидуал ҚР-код олган тадбиркорлар сони 108 мингдан ошган. QR-кодлар орқали амалга оширилган тўловлар ҳажми қарийб 31% га ошиб, 441,79 млрд сўмни ташкил этди.

11 август куни президент танишган тақдимотда ЯТТ ва ўзини ўзи банд қилганлар учун махсус ҳуқуқий режим жорий этилиши маълум қилинди. Улар учун давлат рўйхатидан ўтказишдан тортиб ҳисобот топширишгача бўлган барча асосий хизматларни бирлаштирадиган рақамли платформа яратилади.