Статистика қўмитаси таҳлилига кўра, ташқи савдода экспорт ҳажми 29 млрд доллар бўлди. Мазкур кўрсаткич 2024 йил январь–октябрь ойларидагига қараганда 27,8 фоизга ўсган. Ўтган 10 ойда импорт ҳажми 37,5 млрд долларни ташкил қилган. Бунда йиллик ўсиш ҳажми — 16,9 фоиз. Умумий ташқи савдо тақчиллиги — 8,5 млрд доллар бўлган.

Ҳисобот даврида Ўзбекистон ташқи савдо айланмасининг энг катта улуши Хитой (19,7 фоиз), Россия (15,9 фоиз) ва Қозоғистон (5,9 фоиз) ҳиссасига тўғри келган.

Нималар кўпроқ экспорт қилинди?

Ноябргача бўлган даврда Ўзбекистондан энг кўп экспорт Россияга амалга оширилди (умумий экспортнинг 12,6 фоизи). Шу билан бирга, Хитой (5,6 фоиз), Қозоғистон (4,1 фоиз) ҳамда Афғонистон (4,1 фоиз) улуши юқори бўлди.

Экспорт таркибида товарлар улуши 73,3 фоизни ташкил этган. Жумладан, саноат товарлари (10,9 фоиз), озиқ-овқат маҳсулотлари ва тирик ҳайвонлар (8,2 фоиз), кимёвий воситалар ва шунга ўхшаш маҳсулотлар (6 фоиз) ва ҳар хил тайёр маҳсулотлар (4,9 фоиз) ҳиссаси юқори бўлган.

Ўн ой мобайнида тарихий рекорд қийматдаги — 9,9 млрд долларлик олтин экспорт қилинган. Таққослаш учун, 2024 йил мос даврида бу рақам 6,6 млрд доллар эди. Бу жорий кўрсаткичдан 49,4 фоизга кам.

2025 йилинг 10 ойида олтин сотувлари қиймати мамлакат жами экспорти ҳажмининг 34,1 фоизига тенг бўлган. Ўз навбатида саноат маҳсулотларидан 568,2 млн долларлик табиий газ экспорти ҳам амалга оширилган. Бу бир йил аввалгидан 5 фоизга кўп.

2025 йил январь–октябрь ойларида 7,7 млрд долларлик хизматлар экспорт қилинган. Бу мамлакат жами экспорти ҳажмининг 26,7 фоизига тенг дегани. 2024 йил мос даврига нисбатан ўсиш эса 32,8 фоизга етган. Хизматлар экспорти таркибининг асосий улуши сафарлар (53,1 фоиз) ва транспорт (30,9 фоиз) ҳиссасига тўғри келган.

Импорт таркиби

Январь–октябрь ойларида Ўзбекистон 177 та давлатдан товар ва хизматлар импортини амалга оширган. Энг йирик импорт ҳажми Хитой (30,6 фоиз) ва Россия (18,5 фоиз) ҳиссасига тўғри келган. Ўз навбатида Қозоғистон (7,3 фоиз), Туркия (4 фоиз), Корея (3,7 фоиз), Германия (2,5 фоиз) ва Ҳиндистон (2,5 фоиз) улуши ҳам нисбатан юқори бўлган.

Импорт таркибида энг катта улушни доимгидек машиналар ва транспорт асбоб-ускуналари (34 фоиз) ташкил этган. Мазкур тоифадаги товарлардан 10 ойда қарийб 12,7 млрд долларлик сотиб олинган (йиллик ўсиш 13,2 фоиз). Шу билан бирга, саноат товарлари (15,8 фоиз) ҳамда кимёвий воситалар ва шунга ўхшаш маҳсулотлар (12,3 фоиз) кўпроқ олиб келинган.

Ўтган 10 ой ичида Ўзбекистонга қарийб 1,12 млрд долларлик газ импорт қилинган. Бу катта рақам бўлсада, 2024 йил мос давридагидан 16 фоизга кам.

Ўз навбатида хизматлар импорти ҳажми 4,06 млрд долларни ёки жами импорт ҳажмининг 10,8 фоизини ташкил этган. Бу ўтган йилга нисбатан 32,2 фоизга юқори ҳисобланади. Ушбу тоифадаги импорт таркибида сафарлар (51,3 фоиз) ва транспорт (20,1 фоиз) хизматлари асосий улушни ташкил этган.