O’zbekistonda ayrim yo’l harakati qoidalarini buzganlik uchun jarima miqdorini oshirish taklif etildi
Strategik islohotlar agentligi maʼmuriy jarima choralarini qayta koʻrib chiqish boʻyicha bir qator takliflarni ilgari surdi. Jumladan, fuqarolarning hayoti va sogʻligʻi bilan bevosita bogʻliq boʻlgan huquqbuzarliklar uchun jarima miqdorini oshirish taklif etildi.
Strategik islohotlar agentligi tomonidan maʼmuriy jarima choralarini qayta koʻrib chiqish boʻyicha bir nechta takliflar ishlab chiqildi.
Xususan, agentlik maʼmuriy jarimalar miqdorini belgilash mexanizmi yoʻqligi sababli sodir etilgan huquqbuzarliklar uchun nomutanosib jarima solinayotganini aniqlagan.
Masalan, avtomobil oynalarini ruxsatnomasiz qoraytirganlik uchun nazarda tutilgan 8,5 million soʻmlik (bir yil ichida takror sodir etilganda 13,6 mln soʻm) jarima belgilanganda, ruxsatnomaning narxi 11-13 million soʻm boʻlgan. Bugungi kunda ruxsatnoma 2,7 mln soʻm etib belgilangan, ammo jarima miqdori oʻzgarishsiz qolgan. Agentlik tomonidan taqdim etilgan maʼlumotlarga koʻra, Qozogʻistonda avtomobil oynasini qoraytirganlik uchun oʻrnatilgan jarima 468 ming soʻmni, Rossiyada – 60 ming soʻmni, Belarusda – 138 ming soʻmni tashkil qiladi.
Bundan tashqari, fuqarolarning hayoti va sogʻligʻi bilan bevosita bogʻliq boʻlgan huquqbuzarliklar uchun jarima miqdorini oshirish masalasini koʻrib chiqish masalasi ilgari surilmoqda.
Agentlik piyodalarning hayoti va sogʻligʻiga bevosita daxldor boʻlgan YTHlar uchun belgilangan jarimalarni qayta koʻrib chiqish va ogʻirlashtirish zarur, deya hisoblamoqda. Hozirda piyodalar yoʻlaklarida transport vositalarida harakatlanishga 170 ming soʻm, piyodalar yoʻlning belgilanmagan joyidan kesib oʻtishiga nisbatan 113 ming soʻm miqdorida jarima belgilangan.
Maʼlumot uchun, Germaniyada piyodani oʻtkazib yubormaganlik uchun belgilangan jarima miqdori 1,1 million soʻm, Buyuk Britaniyada – 1,6 million soʻm, Fransiyada – 1,85 million soʻm, Birlashgan Arab Amirliklarida – 1,7 million soʻmni tashkil etadi.
Bundan tashqari, Maʼmuriy javobgarlik toʻgʻrisidagi kodeks normalarining korrupsiyaga qarshi kompleks ekspertizasini oʻtkazish va mazkur kodeksga maʼmuriy jazoning alohida turi sifatida “ogohlantirish” institutini kiritish taklif etilmoqda.
Huquqbuzarliklarning oldini olish maqsadida bir qator mamlakatlarda (xususan, Belarus, Latviya, Qozogʻiston, Rossiya, Germaniya, Italiya) maʼmuriy jazoning alohida turi sifatida “ogohlantirish” instituti joriy qilingan. “Ogohlantirish” jismoniy va yuridik shaxslarning sogʻligʻi, hayoti va mulkiga, atrof-muhitga zarar yetkazmaydigan huquqbuzarliklar uchun qoʻllaniladi.
Maʼmuriy javobgarlik toʻgʻrisidagi kodeksga (23-modda) muvofiq, maʼmuriy huquqbuzarlik sodir etganlik uchun 7 turdagi maʼmuriy jazo qoʻllanilishi mumkin. Biroq maʼmuriy jazo turi sifatida “ogohlantirish” qoʻllanilmaydi. Agentlik “ogohlantirish” institutini alohida turdagi maʼmuriy jazo sifatida joriy etilishini yoqlab chiqmoqda.
