Amazon, Microsoft, Алпҳабет (Google) ва Meta каби глобал технологик гигантлар сунъий интеллект соҳасига инвестиция киришни оширмоқда. 2025 йилда улар киритиладиган сармоя 320 миллиард доллардан ошиши мумкин, деб ёзади Financial Times.

Дунёнинг етакчи компаниялари йирик тил моделлари ва булутли сервислар соҳасида устунликни сақлаб қолиш мақсадида сунъий интеллект инфратузилмаларига инвестицияларни оширмоқда. Хусусан, Amazon жорий йилда ушбу йўналишга 100 миллиард доллар инвестиция киритишни режалаштирган — ўтган йилда компания 77 миллиард доллар, 2023 йилда эса 48 миллиард доллар сарфлаган эди.

Meta ўз навбатида сунъий интеллектга 60-65 миллиард доллар сарфлашни режалаштирмоқда — бу таҳлилчиларнинг прогнозларидан 70 фоизга кўп. Microsoft йил давомида булутли СИ маълумотлар марказларига 80 миллиард доллар йўналтиради — компаниянинг ўтган йилги харажатлари 53 миллиард долларни ташкил этган.

Ҳамма инвесторлар ҳам технологик гигантлар каби ғайратли эмас. Бундай инвестициялардан кутилаётган даромад борасида хавотир ортиб бормоқда. Масалан, Alphabet Googleʼнинг булутли бизнеси ўсиш натижалари кутилганидан паст бўлгани сабабли 200 миллиард доллар бозор капиталлашувини йўқотди. Microsoft ҳам шунга ўхшаш хавотирлар туфайли 200 миллиард доллар бозор қийматини йўқотди.

Америка компаниялари учун асосий таҳдид январь ойида R1 моделини тақдим этган Хитойнинг DeepSeek сунъий интеллект стартапи бўлди. У нисбадан арзон ва кучсиз процессорлардан фойдаланган ҳолда OpenAI ва Google маҳсулотлари билан рақобатлаша олади. Натижада Nvidia акциялари 17 фоизга, капитализацияси эса бир кунда 600 миллиард долларга тушиб кетди.

Мутахассисларнинг таъкидлашича, инвесторлар сунъий интеллект соҳасида киритилаётган сармояларнинг реал самарадорлиги исботини талаб қилмоқда. «Биз Azure’ни ривожлантиришга 80 миллиард доллар инвестиция киритамиз, шу боис мижозларимиз Microsoftʼга ишонишлари мумкин», — дейди компания бош директори Сатя Наделла. Марк Цукерберг ҳам СИга кенг кўламли инвестиция Meta’га рақобатчиларидан устунроқ бўлишини таъминлашга ёрдам беришини таъкидлаган.

Унинг компанияси СИга киритилган сармоя ўзини оқлашини намойиш этган кам сонли гигантлардан ҳисболанади. Реклама таргетинг алгоритмларининг яхшиланиши ҳисобига Facebook ва Instagram даромадлари ортмоқда. Шу билан бирга, Google қийин вазият қаршида қолган, қидирув тизимига СИнинг жорий этилиши, анъанавий рекламага салбий таъсир кўрсатиши мумкин. Шунга қарамай, Googleʼнинг рекламадан келаётган даромадлари 2024 йилнинг охирги уч ойида 13 фоизга (54 миллиард долларгача) ошган.

Бундан ташқари, SoftBank ва Oracle OpenAI билан бирга АҚШ сунъий интеллект инфратузилмасига 100 миллиард доллар инверстиция киритмоқда. Ушбу маблағлар 500 миллиард долларгача ошиши мумкин. Таъкидланишича, агар харажатлар реал натижаларга олиб келмаса, СИ бозорида инқироз юз бериши мумкин.