Жорий йилнинг биринчи чорагида Ўзбекистонга хориждан пул ўтказмалари ҳажми 3,3 миллиард долларни ташкил қилди. Бу ҳақда Марказий банкнинг пул-кредит сиёсати бўйича шарҳида келтирилган.

Натижада кўрсаткич ўтган йилнинг мос даврига (2,5 миллиард доллар) нисбатан 32 фоизга ўсди. Январь ва март ойларида мамлакатга 1 миллиард доллар миқдорида ўтказмалар амалга оширилган. Энг юқори ўсиш март ойида кузатилиб, бу ойда трансчегаравий ўтказмалар ҳажми 1,2 миллиард долларга етган.

Марказий банк юқори ўсишни асосий савдо ҳамкорларнинг валюталари мустаҳкамланиши ҳамда меҳнат ҳақи юқорироқ давлатларга мигрантлар оқимининг ошиши билан изоҳлайди.

Бундан ташқари, сўнгги даврларда пул ўтказмалари даромадлар ўсиши ўзгарувчанлигининг асосий омили бўлиб қолмоқда.

Меҳнат мигрантларини қабул қилувчи мамлакатлар валюта курсларининг мустаҳкамланиши ҳамда бу давлатларда иш ҳақларининг ошиши, юқори даромадли мамлакатларда ишчи кучига бўлган талабларнинг ошиб бораётганлиги шароитида пул ўтказмаларининг ўсиш прогнози 10−12 фоиздан 15−18 фоизгача ошириш бўйича қайта кўриб чиқилди.

Шу билан бирга, иқтисодий ҳамкорлар валюта курсларида кутилаётган юқори тебранувчанлик ҳамда иқтисодий ўсиш прогнозларини пасайиш томонга қайта кўриб чиқилиши туфайли, истиқболда пул ўтказмалари динамикаси бўйича маълум даражадаги ноаниқликлар сақланиб қолмоқда.