Қайси банклар микроқарз бермоқда?
2025 йил май ойи ҳолатига кўра, мавжуд 35 та банкдан 25 тасида микроқарзлар берилмоқда. Улар минимал икки ойдан максимал беш йилгача муддатга, 10 млн сўмдан 100 млн сўмгача берилиши мумкин.
Айрим банклар банк мижозлари учун пасайтирилган фоизда микроқарзлар беради. Банклар микроқарзларни онлайн ва офлайн режимда беришади. Масофадан беришда кредит банкнинг мобил иловасида расмийлаштирилади ва мижознинг виртуал ёки жисмоний картасига ўтказилади.
Шунингдек, агар хоҳласа, қарз олувчи банкка ташриф буюриб, нақд пулда ёки банк томонидан чиқарилган картада пул олиши мумкин.
Кредит учун гаров сифатида қуйидагилар қабул қилинади:
- учинчи томон кафолати;
- суғурта полиси;
- ликвид гаров — транспорт воситалари, кўчмас мулк, заргарлик буюмлари.
Қарз олувчига қўйиладиган асосий талаблар — ижобий кредит тарихи ва ҳозирги иш жойида камида олти ой иш тажрибаси.
Марказий банк 2024 йил 1 ноябрдан кредит ташкилотлари томонидан жисмоний шахсларга онлайн кредит ажратиш жараёнида банк карталари билан боғлиқ шубҳали фрод операцияларининг олдини олишга қаратилган вақтинчалик тартибни жорий этди.
Унга кўра, илова орқали ариза беришда биометрик идентификациядан ўтиш керак. Бу аризачининг шахсан ўзи томонидан берилганлигини аниқлаш имконини беради. Агар қарздорнинг қарзлари кўп ёки муддати ўтган бўлса, банк кредитни рад этиши ёки унинг миқдорини камайтириши мумкин.
