Ўзбекистонда миллий булутли платформа ҳамда сунъий интеллект модели яратилади
Яқин беш йилда хусусий инвесторлар иштирокида қуввати 500 МВтдан ортиқ бўлган 20 та дата-марказ қуриш режалаштирилмоқда.
Шавкат Мирзиёев IV Тошкент халқаро инвестиция форумининг ялпи мажлисида дунё иқтисодиёти янги давр ва ўзгаришлар олдида тургани, бу барқарор ривожланиш учун давлатларни ҳамкорликда ишлашга ундаётганини қайд этди.
Асосий йўналиш «яшил» иқтисодиёт моделига ўтиш бўлиб, хусусан, Ўзбекистон иқтисодиётни барқарор энергия ресурслари билан таъминлаш учун «яшил» энергетикани ривожлантирмоқда.
Соҳага қарийб 6 млрд доллар тўғридан-тўғри хорижий инвестиция кириб келди. Электр энергияси ишлаб чиқариш ҳажми 59 млрддан 82 млрд кВт/соатга етди. Кейинги беш йилда бу кўрсаткич 120 млрд кВт/соатдан ошиб, «яшил» энергия улуши 54 фоиз га етади.
Электр тармоқларини янгилашга 4 млрд доллар жалб қилинади. Жорий йилда Самарқандда, келгуси йилдан яна 8 та ҳудудда электр тармоқлари хусусий шерикликка берилади. Шу йил глобал углерод бозорларига қўшилиб, Яшил Ўзбекистон иқлим инвестициялари платформаси яратилади.
Президент иккинчи йўналиш сифатида иқтисодиётнинг «драйвери»га айланаётган рақамли технология ва сунъий интеллектни қайд этди. Шу йилнинг ўзида IT экспорти 1 млрд долларга етади. 2030 йилга бориб, буни 5 баравар ошириш учун салоҳият ва имконият етарли эканлиги таъкидланди.
2026 йил «Булутли технологиялар» миллий платформаси ишга тушади. Яқин беш йилда хусусий инвесторлар билан бирга қуввати 500 МВтдан ортиқ 20 та дата-марказ барпо этилади.
Шунингдек, мамлакат бой тарихи, азалий қадриятлари ҳамда янги креатив ғояларни ўзида тақдим этувчи сунъий интеллектнинг миллий модели ишлаб чиқилади. Тизим самарадорлигини таъминлаш учун «Бир миллион сунъий интеллект етакчилари» лойиҳаси бошланган.
Яна бир устувор йўналиш — молия соҳасини трансформация қилиш бўлади. Мамлакатда Молиявий барқарорлик кенгашини таъсис этиш, Марказий банкда киберхавфсизлик ва молиявий технологиялар платформаларини ишга тушириш режалаштирилган.
Президент бозор капиталлашуви 1 млрд доллардан ортиқ бўлган стартаплар сонини кўпайтириш мақсадини эълон қилди. Шу боис «Муқобил инвестиция жамғармалари тўғрисида»ги қонун лойиҳаси ишлаб чиқилди. Келгуси беш йилда венчур ва бошқа муқобил сармоялар ҳажмини 1 млрд долларга олиб чиқилади.
