Ўзбекистон автомобил саноати корхоналари 2026 йилнинг дастлабки 4 ойида 121 601 та автомобил сотди, дея хабар берди “Ўзавтосаноат” АЖ. Бу кўрсаткич – ўтган йилнинг мос даврига нисбатан 14 760 тага ёки 13,8 фоизга кўп.

Бир йиллик динамикага қаралса, BYD Uzbekistan сотувларини кескин оширгани эътиборли. Компания ўтган йили январ-апрел ойларида 5953 та автомобил сотган бўлса, жорий йилнинг шу даврида сотувлари 83,5 фоизга ошган ва 10 927 тага етган.

Шунингдек, ҳисобот даврида Khorezm Auto сотувлари 30 фоизга (28 789 тадан 37 559 тага) ADM Jizzakh сотувлари 19 фоизга (12 120 тадан 14 460 тага) ошган.

Бозор етакчиси UzAuto Motors’да эса 2 фоизлик пасайиш кузатилган: январ-апрел ойларида сотилган автомобиллар сони 59 427 тадан 58 168 тага қисқарган.

Автомобил брендлари кесимидаги рақамларга келсак, Chevrolet брендининг бозордаги улуши 80 фоиздан пасайганини кўриш мумкин: ўтган йил 4 ойликда бу брендга мансуб автомобиллар бозорнинг 82,5 фоизини ташкил этган бўлса, ҳозир бу кўрсаткич 78,7 фоизгача тушган.

Умуман олганда, Chevrolet сотувлари 8,5 фоизга ошганини ҳам қайд этиш лозим. Лекин бошқа брендлар, аниқроғи BYD (+83%) ва Kia (+15%) сотувлари бозор етакчисига қараганда тезроқ ўсгани натижасида ўтган бир йил давомида Chevrolet’нинг бозордаги доминант улуши 3,8 фоиз пунктга қисқарган.

Автомобил моделлари қатори етакчиси – Chevrolet Cobalt сотуви жорий йилнинг 4 ойида 30 мингтага етмаган, бу – 29 фоизлик пасайишни кўрсатади.

Damas, Tracker ва Onix‘га талаб эса сезиларли ошган: Damas сотуви 34 фоизга (25,6 мингта сотилган), Tracker харидорлари 35 фоизга (14 мингта), Onix сотувлари эса 2,4 баробарга (13,8 мингта) кўпайган.

Chevrolet брендидан ташқарида энг кўп сотилаётган модел ҳамон Kia Sonet бўлиб қолмоқда: бу автомобил жорий йил 4 ойликда 7189 та сотилди, бу – бир йил олдингига қараганда 37 фоизга кўп.

Кейинги ўриндаги BYD Song Plus Champion DMI сотувлари 2 баробарга ошган (3,8 мингта сотилган, +93%), лекин ўсиш суръати бўйича етакчи у эмас.

BYD Uzbekistan ўтган йили шу даврда қарийб 843 та Yuan Up сотган эди, жорий йилда эса бу кўрсаткич 2752 мингтага етди. Яъни бу моделга талаб ўтган бир йил давомида 3,2 баробарга ошган.