Octobank Humans компанияси билан ўзаро ҳисоб-китобларга хизмат кўрсатишни тўхтатиш ва уни қўшма молиявий хизмат доирасида чиқарилган карталар бўйича клиринг ва операциялардан узиб қўйиш режалаштирилаётганини маълум қилди. Узилиш 13 июнь куни соат 18:00 дан бошланади.

«Бундай қарор Humans МЧЖ томонидан шартларнинг мунтазам равишда бузилиши ва қабул қилинган шартнома мажбуриятларининг бажарилмаслиги муносабати билан қабул қилинди», — дейилади банк хабарида.

Томонлар 2020 йилдан буён ҳамкорлик қилиб келмоқда. «Оcтобанк шартнома шартларини виждонан бажарган, бироқ Humans МЧЖ Humans молиявий хизмати доирасида амалга оширилган клиринг операциялари бўйича банк томонидан пул компенсациясини ўз вақтида қайтаришдан бир неча бор бўйин товлаган ва мукофот пулини ўз вақтида тўламаган», — дейилади хабарда.

Ҳозирда Тошкент туманлараро иқтисодий судида Octobank томонидан Humans компаниясидан жами 500 млрд сўмдан ортиқ қарздорликни ундириш ва етказилган зарарни қоплаш бўйича қўзғатилган иқтисодий иш кўриб чиқилмоқда.

Кўрсатилган вақтдан бошлаб банк Humans компаниясининг Visa кобейжинг карталарига хизмат кўрсатишни тўхтатади.

Шартнома шартларига кўра, карталарга ўтказилган маблағлар автоматик равишда Humans тизимидаги алоқа абонентларининг шахсий ҳисоб рақамларига ўтказилади.

Пулни қайтариш учун бевосита Humans компаниясига мурожаат қилинг.