Trumpcard.gov сайтида потенциал ариза берувчилар кутиш рўйхатига ёзилишлари мумкин. Бунинг учун улар ўз исми, электрон почта манзили, келиб чиқиш мамлакати ва ариза бериш тоифасини кўрсатишлари керак.

Ариза бериш тоифаси жисмоний шахс, компания ёки бошқа субъект номидан бўлиши мумкин. Шунингдек, ариза ўзи учун, оила аъзолари учун ёки бошқа шахс учун топширилаётганини танлаш имконияти мавжуд. Танлаш учун минтақалар орасида Осиё, Европа, Африка, Шимолий ва Жанубий Америка ҳамда бошқа ҳудудлар бор.

Бош саҳифада картанинг ўзи тасвирланган: олтин рангдаги фон, Трампнинг юзи, Озодлик ҳайкали, президентнинг имзоси ва иштирок суммасини англатувчи 5М қисқартмаси жойлаштирилган.

Дастур биринчи марта 2025 йил февраль ойида эълон қилинган бўлиб, 1990 йилдан бери мавжуд бўлган EB-5 визасининг ўрнини босади. Трампнинг баёнотига кўра, янги формат нафақат бой одамларни, балки иқтидорли мутахассисларни ҳам жалб қилишга ёрдам беради, уларнинг дастурдаги иштирокини ҳомий компаниялар тўлаши мумкин бўлади.

Унинг сўзларига кўра, Trump Card АҚШ фуқаролигини олиш йўлини таъминлаши мумкин, бунда унинг эгалари мамлакатда солиқ тўлашга мажбур бўлади.

Оқ уйнинг ҳисоб-китобларига кўра, дастур 1 млнгача иштирокчини жалб этиши ва АҚШ иқтисодиётига 5 трлн доллар киритилишини таъминлаши мумкин.

Савдо вазири Ховард Латник март ойида EB-5 дастурини «мутлақо бемаъни ва фирибгарлик» деб танқид қилиб, янги механизмни анча шаффоф ва самарали эканлигини таъкидлади.

Бироқ, экспертларнинг огоҳлантиришича, Trump Card’нинг амалга оширилиши ҳуқуқий масалаларни келтириб чиқаради. Иммиграция қонунчилиги янги виза дастурларини Конгресс томонидан тасдиқлашни талаб қилади ва ҳозирги ташаббус ҳали бундай қўллаб-қувватланмаган.

Таҳлилчилар, шунингдек, бой хорижликлар ҳуқуқий барқарорлиги ҳали тасдиқланмаган мақом учун миллионлаб пул тўлашга тайёр бўлишларига шубҳа қилишмоқда.