1 июлдан бошлаб Ўзбекистон аэропортларида ички рейслар учун янги тартиб жорий этилади. Бу ҳақда Uzbekistan Airports матбуот хизмати хабар берди.

Унга кўра, фуқаролар ички авиапарвозлар учун аэропортда рўйхатдан ўтишда шахсини тасдиқловчи ҳужжатларнинг электрон вариантидан фойдаланишлари мумкин бўлади.

Аэропортда рўйхатдан ўтишдан олдин йўловчи Ягона портал сайти/мобил иловаси ёки «Ижтимоий карта» мобил иловасидаги шахсий кабинетига кириб, шахсий маълумотлар саҳифасига ўтади ва электрон шаклда шахсни тасдиқловчи ҳужжатларни рўйхатдан ўтиш жойидаги ходимга кўрсатади.

Қайд этилишича, фақат Ягона портал сайти/мобил иловаси ёки «Ижтимоий карта» мобил иловасидаги жорий маълумотлар шахсни тасдиқловчи ҳужжат сифатида қабул қилинади.

Шунинг учун рўйхатдан ўтиш пайтида шу каби ҳужжатларнинг нусхалари, фотосуратлари, паспорт/ID’нинг сканерланган вариантлари ёки шахсий маълумотлар бўлган веб-сайт саҳифасининг «скриншот»лари қабул қилинмайди.

Ўтган йилнинг декабрида қабул қилинган ҳукумат қарорида 1 июлдан Ўзбекистонда фуқаролик паспорти ва бошқа ҳужжатларнинг электрон нусхаси ҳам расмий кучга эга бўлиши белгилаб берилганди.

«Рақамли ҳукумат» тизими идоралараро интеграциялашув платформаси доирасида белгиланган ҳужжатларнинг унификацияланган рақамли сервислари жорий этилади.

Ягона портал (мй.гов.уз) ва «Ижтимоий карта» мобил иловасида рақамли сервислардан фойдаланиш имконияти яратилиб, улар Ўзбекистон ҳудудида мажбурий тартибда қабул қилинади.

Бу рўйхатда қуйидаги ҳужжатлар мавжуд:

• Биометрик паспорт;
• ID-карта;
• Ҳайдовчилик гувоҳномаси;
• Туғилганлик ҳақида гувоҳнома;
• Никоҳ қайд этилганлиги ҳақида гувоҳнома;
• Никоҳдан ажралганлик ҳақида гувоҳнома;
• Автомобиль рўйхатдан ўтказилганлиги тўғрисида гувоҳнома (техник паспорт, техник талон);
• Пенсия (нафақа) гувоҳномаси;
• Фуқаролиги бўлмаган шахснинг яшаш гувоҳномаси (ID-картаси);
• Ногиронлик тўғрисида маълумотнома;
• Автомобилнинг мажбурий суғуртаси (фуқаролик жавобгарлиги) бўйича суғурта полиси;
• Олий, ўрта махсус, касб-ҳунар ва профессионал таълим олганлик тўғрисидаги расмий ҳужжат;
• Талабалик гувоҳномаси;
• ЯТТ сифатида рўйхатдан ўтганлик тўғрисидаги гувоҳнома;
• Ўзини ўзи банд қилган шахс сифатида рўйхатдан ўтганлиги тўғрисида маълумотнома;
• Турар жой объектларининг кадастр паспорти;
• Автомобилни бошқариш ҳуқуқини берувчи ишончнома.

Бунда мазкур ҳужжатларнинг қоғоз нусхалари банкларда, нотариал идораларда, аэропортларда ички рейсларни рўйхатдан ўтказишда ва Ўзбекистон ҳудудидан ўтувчи поездларга чиқишда талаб этилмайди.

Шу билан бирга, давлат, корпоратив ва бошқа хизматлар, жумладан, электрон хизмат кўрсатиш ҳамда фуқароларни қабул қилишда тегишли ҳужжатларни тақдим этишни талаб қиладиган давлат органлари ва бошқа ташкилотларда уларни сўрашга йўл қўйилмайди.