Марказий банк кредит ташкилотлари томонидан аҳолининг ижтимоий нафақалари ва моддий ёрдам маблағларини уларнинг розилигисиз автоматик тарзда ечиб олинишини инсофсиз амалиёт сифатида баҳолади. Бу ҳақда регуляторнинг 30 июнь куни кредит ташкилотларига юборилган хатида маълум қилинди.

Марказий банкка мурожаат қилган фуқаролар нафақа ва моддий ёрдам маблағлари банк карталарига тушгач, кредит қарздорлигини сўндириш учун автоматик тарзда ечиб олинаётганини билдирган.

Регулятор аҳолининг заиф қатлами, жумладан кам таъминланган оилалар, ногиронлиги бўлган шахслар ҳамда вақтинча меҳнатга лаёқатсиз бўлган фуқароларга тўланадиган ижтимоий нафақалар ва шу каби бошқа моддий ёрдам пуллари давлат томонидан бериладиган ижтимоий ҳимоя маблағлари ҳисобланишини қайд этган.

Бундан ташқари, Ўзбекистон Конституциясининг 57-моддаси билан давлат меҳнатга лаёқатсиз ва ёлғиз кексалар, ногиронлиги бўлган шахслар ҳамда аҳолининг ижтимоий жиҳатдан эҳтиёжманд бошқа тоифаларининг ҳуқуқларини ҳимоя қилади.

«Истеъмолчиларнинг ҳуқуқларини ҳимоя қилиш тўғрисида»ги қонуннинг 21-моддасида эса шартномага истеъмолчиларнинг қонунчиликда назарда тутилган ҳуқуқларини камситадиган, шунингдек уларга қонунчиликда белгиланган имтиёзлар ва афзалликларни бермаслик тақиқланиши белгилаб қўйилган.

Марказий банк фуқароларга бериладиган ижтимоий нафақаларни кредит бўйича қарздорликни сўндириш учун акцептсиз усулда ечиб олинишини адолат тамойилларига зид ва инсофсиз амалиёт сифатида баҳолади.

Шундан келиб чиқиб, регулятор барча кредит ташкилотларига ички тартиблар ва автоматик ундирув тизимларини қайта кўриб чиқиб, ижтимоий тўловларни рухсатсиз қарздорликни қоплашга йўналтириш амалиётини чеклашни топширди. Улар фуқаролардан шикоят келиб тушса, қарздорликни ундиришни тўхтатиши ва ечиб олинган маблағларни қайтариб бериши керак.

Марказий банк кредит ташкилотларини истеъмолчилар билан ўзаро муносабатларда адолатли бўлишга ва бундай инсофсиз амалиётларни тўхтатишга чақирмоқда.