Yandex Go ҳайдовчилари ва курьерлари олти ойда 340 млн доллар даромад олди
Yandeks Go экотизимида 179 минг ҳайдовчи ва 49 минг курьер фаолият юритмоқда. Компания кундалик фаол бўлган — кунига 7−8 соат ишлайдиган ижрочилар сони ортиб бораётганини таъкидланди.
2024 йилда Ўзбекистонда Yandex Go экотизимидаги ҳайдовчи, курьер ва ҳамкорлар жами 530 млн доллар даромад олди. Бу ҳақда Yandex Uzbekistan’нинг давлат органлари билан алоқалар бўйича директори Сардор Қодиров ўзининг Telegram-каналида маълум қилди.
Жорий йилнинг биринчи ярмида эса бу кўрсаткич 340 млн долларни ташкил этиб, ўтган йилнинг мос даврига нисбатан 50 фоиздан ортиққа ошган.
Қодировнинг қайд этишича, бу рақамлар “Такси”, “Етказиб бериш”, “Yandex Еда” ва “Лавка” хизматларидан олинган буюртмалар асосида ҳисобланган бўлиб, у комиссиясиз соф даромадни ўз ичига олади.
2025 йилнинг июнь ойи ҳолатига кўра, Yandeks Go экотизимида 179 минг ҳайдовчи ва 49 минг курьер фаолият юритмоқда. Компания кундалик фаол бўлган — кунига 7−8 соат ишлайдиган ижрочилар сони ортиб бораётганини таъкидлади.
2 июлдан агрегаторлар ўзини ўзи банд қилган такси ҳайдовчилари ва курьерлар учун солиқ тўлашни бошлаганди. Компаниялар йиллик даромади 100 млн сўмдан юқори бўлган ўзини ўзи банд қилган шахслардан тўланиши лозим бўлган солиқларни ушлаб қолади ва Солиқ қўмитасига йўналтиради.
Yandex Uzbekistan эса платформалардаги ўзини ўзи банд қилган ҳайдовчилар ва курьерлар учун солиқ тўлаш жараёнини автоматлаштирган биринчи компания бўлди. Солиқ қўмитасининг қайд этишича, жорий йил давомида йиллик даромади 100 млн сўмдан ошган ўзини ўзи банд қилганлар сони 189 тани ташкил этган.
