Ўзбекистон Universal Mobile Systems мобил алоқа операторини (Mobiuz бренди) $300 млнга сотишни режалаштирмоқда. Бу ҳақда Bloomberg битим тафсилотлари билан таниш бўлган икки хабардор манбасига таяниб хабар берди.

Нашрнинг аниқлик киритишича, Давлат активларини бошқариш агентлиги матбуот хизмати изоҳ беришдан бош тортган.

Қатар, Саудия Арабистони, Озарбайжон ва Европанинг салоҳиятли инвесторлари Mobiuzʼни хусусийлаштиришга олдиндан қизиқиш билдирмоқда.

Bloomberg Fitch Solutions’нинг шўба корхонаси BMI’га таяниб ёзишича, 2024 йил охирида Ўзбекистонда деярли 36 млн абонент бор эди. Шу билан бирга, Mobiuzʼнинг телекоммуникация бозоридаги улуши 20,9% га етган.

Давактив агентлиги маълумотларига кўра, ўтган йили Mobiuz даромади $164 млнни, фоизлар, солиқлар ва амортизациядан олдинги фойда эса $41 млнни ташкил этган.

Июнь ойи бошида Mobiuz мобил алоқа операторини хусусийлаштириш бошланди. Давлат корхонанинг 100% устав фондидаги ўз улушини сотмоқчи. Битим бўйича етакчи стратегик ва молиявий консультант — Rothschild & Cо инвестиция банки, қўшимча молиявий консультант эса KPMG ҳисобланади. Аризалар 1 августгача қабул қилинади.