2025 йил сентябрда товар ва хизматлар нархининг йиллик ўсиши (инфляция) 8 фоизни ташкил этди. Августда бу кўрсаткич 8,8 фоиз, 2024 йил сентябрь ҳолатига 10,5 фоиз бўлган. Статистика қўмитаси ўтган ойда 30 кунлик нархлар ўсишини умумий 0,6 фоиз даражасида қайд этган.

Нархи ошган товар ва хизматлар

Сентябрда қуйидаги асосий озиқ-овқат маҳсулотлари қимматлашган:

• Тухум — 6,5 фоиз;
• Товуқ болдири ва сон қисмлари — 1,1 фоиз;
• Бошқа парранда гўштлари — 1,2 фоиз;
• Қўй гўшти — 1,5 фоиз;
• Лаҳм (суяксиз) мол гўшти — 1,8 фоиз;
• Суякли мол гўшти — 1,7 фоиз;
• Шакар — 0,7 фоиз.

Йиллик ҳисобда қўй гўшти нархи қарийб 26,8 фоизга, суякли мол гўшти 23,2 фоизга ошган.

Ой давомида бензин нархи 1,4 фоизга, шу йил бошига нисбатан эса 5,9 фоизга қимматлашган. Дори воситалари нархи 0,2 фоиз, соғлиқни сақлашнинг бошқа хизматлари қиймати 0,4 фоизга ошган.

Арзонлашган товар ва хизматлар

Ўтган ойда мева–сабзавотлардан тарвуз 5,6 фоизга, қовун 5,5 фоизга, булғор қалампири 10,4 фоизга тушган. Помидор 16,9 фоиз, узум 5,4 фоиз арзонлашган. Ўз навбатида сабзи (7,7), пиёз (3,6 фоиз) ҳамда олма (1 фоиз) нархларида пасайиш кузатилган.*

Етиб бўлмаётган таргет

2019 йилдаги президент фармонида инфляция бўйича доимий мақсад (таргет) 5 фоиз бўлиши, бунга 2023 йилда эришилиши белгиланган. Бироқ бу вазифа ҳалигача бажарилмади. Бугунгача инфляция таргетига етиш муддатлари камида олти марта ўзгартирилди. Сўнги прогнозга кўра, мақсадга 2027 йилда эришилиши кутилмоқда. Иқтисодиёт ва молия вазирлиги эса янада узоқроқ муддатни кўзлаяпти (2028 йил).

Жорий йил 11 сентябрь куни Тошкент шаҳрида Марказий банк раҳбарияти журналистлар билан матбуот анжумани уюштирди. Ташкилот раиси Тимур Ишметов нега инфляция таргети 5 фоизга тушмаётгани, мақсад доимий равишда кейинги сурилаётгани ҳақидаги саволга жавоб беришга уринди. Айтилишича, бунга қатор сабаблар мавжуд. Улардан бири монополия ва эркин бўлмаган бозор ҳисобланади.

«Прогнозимиз ички ва ташқи омилларга асосланади. Лекин ҳаётда бу ўзгарса, прогноз ҳам ўзгариши табиий. Ҳукумат бозорларда структуравий ислоҳотларни давом эттиришини прогнозларда доим кўзда тутамиз. Турли хил товарлар бозорлари бор. Айримларида ҳалигача ҳам бозорларни эркинлаштириш йўлидан юришимиз керак. Бу ҳам, албатта, инфляция даражасига таъсир қилади. Ўша айрим товарлар бўйича ҳам ҳозир ишлар олиб бориляпти. Номонетар факторлар таъсирини камайтириш бўйича ҳукумат билан ишлаяпмиз. Беш-олтита товар бўйича рақобатни кучайтириш, ишлаб чиқариш ва импорт концентрациясини камайтириш масалаларида ишлар олиб бориляпти. Шу ишлар қанчалик самарали бўлишига қараб, умумий пул-кредит сиёсатимиз натижасини беради», деди раис.

Марказий банк жорий йил бошида 2025 йил якунига келиб, йиллик инфляция даражаси 7–8 фоизга тушишини прогноз қилганди. Тимур Ишметов мазкур кутилма янгиланиб, йил якунига инфляция 8,7 фоиз бўлишини билдирди.