Ўзбекистон тўлов воситаси сифатида стейблкоинларга рухсат бериши мумкин
Ўзбекистон тўлов воситаси сифатида стейблкоинлардан фойдаланишни синаб кўриш ва токенлаштирилган акцияларни жорий қилишни режалаштирмоқда. Президент Истиқболли лойиҳалар миллий агентлиги ва Марказий банкка тегишли топшириқлар берди.
Ўзбекистон ҳисоб-китоблар учун стейблкоинлардан (рақамли валюталар) фойдаланишни, шунингдек, фонд бозоридаги активлар токенизациясини синовдан ўтказишни режалаштирмоқда. Бу ҳақда «Ўзбекистон 24» телеканалига берган интервьюсида Истиқболли лойиҳалар миллий агентлиги (ИЛМА) директорининг биринчи ўринбосари Вячеслав Пак маълум қилди.
Унинг сўзларига кўра, президент Шавкат Мирзиёев 10 сентябрь куни бўлиб ўтган йиғилишда ИЛМА ва Марказий банкка тегишли топшириқ берган.
«Ҳисоб-китоблар учун тўлов воситаси сифатида стейблкоинлардан фойдаланишни синовдан ўтказиш, шунингдек, капитал бозорида қимматли қоғозларни токенизация қилишга қаратилган лойиҳаларни амалга ошириш топширилди», — таъкидлади Пак.
Унинг қайд этишича, агентлик ходимлари Марказий банк ва бошқа манфаатдор вазирлик ва идоралар билан биргаликда «давлат раҳбари берган топшириқни бажариш учун барча саъй-ҳаракатларни амалга оширади».
Аввалроқ Қирғизистонда 2025 йилда USDKG стейблкоини — олтин билан таъминланган ва АҚШ доллари курсига боғланган токенни ишга тушириш режалаштирилаётгани хабар қилинганди. Лойиҳа Қирғизистон Молия вазирлиги кўмагида амалга оширилмоқда, у токен захираси сифатида олтин кўринишида 500 миллион доллар ажратиши кўзда тутилган. Стейблкоин трансчегаравий операцияларда ва Марказий Осиёга қаратилган халқаро савдода қўлланади.
10 cентябрь куни Қирғизистонда биткоин-резерв тўғрисидаги қонун лойиҳаси маъқулланди.
Маълумот учун, стейблкоинлар — курси АҚШ доллари, евро ёки олтин каби активларга боғланган криптовалюта токенлари (криптовалютанинг бир тури). Улар ликвид активлар — миллий валюталар, давлат облигациялари ёки бошқа қимматли қоғозларни гаров сифатида ишлатадиган марказлаштирилган ташкилотлар томонидан чиқарилади. Энг машҳур стейблкоинлар USDT (Tether томонидан чиқарилади) ва UCDC (Circle томонидан чиқарилади).
Токенизация — блокчейн ёрдамида қимматли қоғозларга (масалан, акциялар ёки облигациялар) бўлган ҳуқуқларни рақамли шаклга ўтказиш. Қоғоз ёки электрон сертификатлар ўрнига (ҳозиргидек) ҳар бир қимматли қоғоз рақамли токен — блокчейндаги эгалик ҳуқуқини тасдиқловчи шифрланган ёзувга эга бўлади.
