McDonald’s Россиядаги бизнесини сотиши ва мамлакат бозорини тарк этишини эълон қилди
Компания битим ёпилгунга қадар ходимларга иш ҳақи тўланишини таъминлаш ниятида.
McDonald’s фаст фуд ресторанлари тармоғи Россияни тарк этиш ва мамлакатдаги бизнесини сотишга қарор қилди, дея хабар берди компания.
Хабарга кўра, McDonald’s бизнесини сотиш жараёни аллақачон бошланган. Унинг янги эгаси McDonald’s номи, логотипи, савдо белгиси ёки анъанавий меню номларидан фойдалана олмайди.
Аниқлик киритилишича, компания битим ёпилгунга қадар ходимларга иш ҳақи тўланишини таъминлаш ниятида. Бош директор Крис Кемпчинскининг сўзларига кўра, тармоқда 62 минг киши ишлайди.
«Россияда бизнес қилиш энди имконсиз ва бу McDonald’s қадриятларига мос келмайди», дея тушунтирди компания.
Компаниянинг Россиядаги ваколатхонасидаги Forbes манбасининг айтишича, янги бренд остидаги муассасалар июнь ойи ўрталаридаёқ очилиши мумкин. Унга кўра, россиялик сотувчи компанияга тегишли бўлмаган франчайзинг дўконларидан ташқари бутун бизнесни сотиб олади.
Бундан ташқари, етказиб берувчилар билан тузилган барча шартномалар сақланиб қолади.
Россия ва McDonald’s
McDonald’s Россияда 30 йилдан ортиқ вақтдан бери фаолият юритиб келади ва март ойи бошида Украинага ҳужум бошланганидан кейин мамлакатдаги барча — 850 та ресторан фаолияти тўхтатилганини эълон қилди.
Москва мэри Сергей Собяниннинг айтишича, рус бизнеси пойтахтда ёпилган хорижий ресторанлар тармоғини «сокинлик билан» «олти ой, кўпи билан бир йил ичида» алмаштира олади.
Бироқ «Теремок» ресторанлар тармоғи асосчиси Михаил Гончаровнинг фикрича, McDonald’s каби тармоқни 2-3 йил ичида ҳам яратиш имконсиз.
Унинг таъкидлашича, бунинг учун ўнлаб йиллар давомида «юз минглаб раҳбарлар, маркетологлар ва муҳандислар» машаққатли меҳнати ва ҳукуматнинг рағбатлантирувчи чоралари керак бўлади.
Ҳар чораклик ҳисоботга кўра, Россия ва Украинадаги ресторанлар ёпилганидан кейин McDonald’s жиддий йўқотишларга учради. Занжир бинолар ижарасини, вақтинча ёпилган муассасалар ходимларига иш ҳақини тўлаш, шунингдек етказиб берувчиларга тўлаш учун 27 миллион доллар сарфлади.
McDonald’s ресторанлари тармоғи 2022 йилнинг биринчи чораги учун эълон қилган молиявий ҳисоботга кўра, компания фойдаси 2021 йилнинг шу даврига нисбатан 28 фоизга камайиб, 1,54 миллиард доллардан (ҳар бир акция учун 2,05 доллар) 1,1 миллиард долларга (ҳар бир акция учун 1,48 доллар) тушди.