Ўзбекистонда техник жиҳатдан тартибга солиш тизимини янгилаш бўйича тизимли ишлар олиб борилмоқда. Бу орқали ишлаб чиқарувчилар ва тадбиркорлар учун янада қулай шарт-шароитлар яратилмоқда.

Техник регламентларни қайта кўриб чиқиш ва янгилаш Дастури доирасида 21 та техник регламент тасдиқланган. Улардан бири — “Лифт ва лифт хавфсизлик қурилмалари хавфсизлиги тўғрисида”ги техник регламент Европа Иттифоқи директивалари асосида ишлаб чиқилган. Шу билан бирга, яна 36 та техник регламент Вазирлар Маҳкамасига кўриб чиқиш учун киритилган.

Маъмурий юкламани камайтириш мақсадида 747 та товар позицияси бўйича мажбурий сертификатлаш бекор қилинди. Натижада ушбу рўйхат 27 фоизга қисқариб, мажбурий сертификатлаш талаб этиладиган маҳсулотлар сони 2 032 тани (15,5%) ташкил этди.

Шунингдек, 156 та товар позицияси бўйича давлат рўйхатидан ўтказиш амалиёти тугатилди. 1 302 та товар позициясидаги маҳсулотлар учун эса мувофиқликни тасдиқлаш декларация орқали амалга ошириш тартиби жорий этилди.