Американинг самолёт ишлаб чиқарувчи компанияси Boeing Co. Россиядан титан сотиб олишни тўхтатди. Бу ҳақда компаниянинг Россиядаги матбуот хизмати хабар берди.

«Boeing титаннинг сезиларли захираларини тўплади, шу жумладан, Boeing компаниясининг бутун дунё бўйлаб етказиб берувчилар пулини шакллантириш ташаббуси туфайли бир неча йиллардан буён амалга оширилмоқда. Айни пайтда Boeing Россиядан титан сотиб олишни тўхтатди», — деди компания вакили.

Унинг сўзларига кўра, титан захиралари ва муқобил етказиб берувчилар тармоғи Boeing’га фуқаролик самолётларини узлуксиз ишлаб чиқаришни таъминлашга имкон беради. Шунингдек, компания узоқ муддатли истиқболда бизнес барқарорлигини таъминлаш учун чоралар кўришда давом этади.

Қайд этилишича, Россияда жаҳон аэрокосмик саноатидаги кўплаб компаниялар учун энг йирик титан етказиб берувчи — «ВСМПО-Ависма» корпорацияси жойлашган. 2021 йилнинг ноябрь ойида компания ва Boeing келгуси йилларда титан етказиб бериш ва ҳамкорликни кенгайтириш бўйича меморандум имзолагани хабар қилинганди.

Шу билан бирга, томонлар Верхняя Салдадаги (Свердловск вилояти) Ural Boeing Manufacturing (UBM) қўшма корхонасининг иш юк ҳамда илмий-тадқиқот ва ишланмаларга йўналтирилган инвестициялар ҳажмини оширишга, шунингдек, янги титан қотишмаларини яратишни давом эттиришга келишиб олганди.

Бундан ташқари, «ВСМПО-Ависма»да Boeing фуқаролик самолётларининг мавжуд ва келажакдаги моделлари учун қўшимча титан блоклари ҳамда бутловчи қисмларни ишлаб чиқариш муҳокама қилинган.

«ВСМПО-Ависма» томонидан ишлаб чиқарилган титан компонентлари Boeing-737, -767, -777, -787 ва 777Х фуқаролик самолётларини қуришда қўлланилади.

«ВСМПО-Ависма»нинг асосий бенефициари директорлар кенгаши раисининг ўринбосари Михаил Шелков бўлиб, унинг тузилмалари корпорация акцияларининг 65,27 фоизини назорат қилади. Блоклаш улуши — 25 фоиз ва 1 та улуш — «Ростех» давлат корпорациясига тегишли.

Аввалроқ PwC ва KPMG компаниялари Россияни тарк этиши хабар қилинганди. Шунингдек, «Яндекс» АҚШда ҳайдовчисиз автомобилларни синовдан ўтказишни тўхтатгани ҳақида хабар берилди.