Ўзбекистонга импорт қилинадиган автомобиллар ҳажми пастлигича қолмоқда. Бу ҳақда Миллий статистика қўмитаси маълумотларида келтирилган.

Январь март ойларида мамлакатга умумий қиймати 115,1 миллион долларга тенг 6 950 та енгил автомобиль импорт қилинган. Таққослаш учун, 2024 йилнинг биргина январь ойида импорт қиймати 222,8 миллион долларлик 10,2 мингта автомобилни ташкил этди.

Март ойида автомобиль етказиб бериш бироз фаоллик кузатилди. Бу ойда 39,2 миллион долларлик 2511 та машина (Божхона қўмитаси маълумотларига кўра — 2 506 та автомобиль ва 39,31 миллион доллар) олиб келинган.

Хитой маҳаллий бозорга 75 фоиз улуш билан автомобилларнинг асосий етказиб берувчиси сифатида қолмоқда. Бироқ, биринчи чоракда етказиб бериш ҳажми бор-йўғи 5 235 донани ташкил этди, шундан 2 076 таси март ойида олиб келинган.

Иккинчи ўринда 1 425 та автомобиль (20,5 фоиз) билан Жанубий Корея жойлашган бўлиб, март ойида мамлакатдан атиги 234 та автомобиль етказиб берилган. Учинчи ўринни 144 та «иномарка» билан Ҳиндистон эгаллади, кейинги ўринларда 77 та машина билан Япония ва 18 та машина билан АҚШ бормоқда. Қолган мамлакатларга импортнинг 1 фоиздан камроғи тўғри келди.

Божхона қўмитаси маълумотларига кўра, март ойида автомобиллар импорти 2024 йилнинг шу ойига нисбатан миқдор жиҳатидан 40 фоизга, қиймат жиҳатидан эса 2,74 баробарга камайган. Айниқса, гибрид автомобиллар сегментида 23 бараваргача пасайиш кузатилди.