Энергетика вазири ўринбосари Шерзод Хўжаев Kommers.uz билан суҳбатда саноат корхоналарининг Ўзбекистонга киришида энг катта рисклардан бири энергия таъминоти эканини айтди.

Шерзод Хўжаевнинг таъкидлашича, йирик саноат корхоналари Ўзбекистонга киришда ўзининг рискларини баҳолайди. Энг катта рисклардан бири эса энергия таъминоти ҳисобланади.

«Энергия таъминотини қилиб беролмайди булар, мен эртага маҳсулотимни ишлаб чиқаролмайман деган фикр билан сал тортиниб туради. Энергия таъминотидаги муаммонинг ечилганини кўрса, бизнес оқиб кириб келишни бошлайди.

Энг қизиғи, қўшилган қиймат кўпроқ шаклланадиган, юқори технологияли бизнес кириб кела бошлайди. Сиз дурадгорлик цехида электр энергияни ўчириб қўйсангиз, озгина кутадида, таъминот тиклангандан кейин, туриб яна ишлашни бошлайди.

Лекин агар мураккаб жараёнлар кечадиган бирон корхонанинг электр энергиясини ўчириб қўйсангиз, унинг қанчадир маҳсулоти кераксизга айланади. Ва корхона зарар кўради. Улар ҳар сафар таъминотчи корхона билан судлашиб юргандан кўра, бу иш билан шуғулланмасликни маъқул кўради», — деган Шерзод Хўжаев.

Суҳбатни тўлиқ қуйида томоша қилишингиз мумкин:

Аввалроқ Шерзод Хўжаев Kommers.uz’га берган интервьюсида қишда электр энергияси таъминотига чекловлар киритилишининг сабабини тушунтиргани хабар қилинганди.