Иқтисодчи Исмоил Туропов Kommers.uz’га берган интервьюсида охирги 2-3 йилда аҳоли ўртасида онлайн омонатлар оммалашгани ва бу омонатлар бозорида катта ютуқ бўлганини таъкидлади.

Иқтисодчининг қайд этишича, пандемия туфайли масофавий хизматлар ривожланиши фонида онлайн омонатлар ҳажми ошган.

«Охирги 2–3 йиллик тенденцияни қарасак, омонат бозоридаги энг катта ютуқ бу онлайн омонатларнинг оммалашгани бўлди. Олдин, технологик ютуқлар бироз камроқ бўлган пайтда онлайн омонат қўйиш бу даражада оммалашмаган эди. Пандемия баҳонасида барча масофавий хизматлар ривожлангани сингари онлайн омонатлар ҳам ривожланди.

Омонатлар таркибида кўрилса ҳам, онлайн омонатлар улуши анча ортиб қолган. Охирги йилларда 3 та рақамли банкнинг 2 таси онлайн омонатларни таклиф қилаётганлиги бошқа банкларнинг ҳам онлайн омонатларни тарғиб қилишига туртки бўлди. Бунинг натижасида аҳолига янаям қулай шароит яралди. Энди банкка бориш шарт эмас. Шу даражада эгилувчан таклифлар чиқиб кетдики, турган кунига пул тўлайди. Яъни талаб қилиб олингунча шарти асосида ҳам жозибали фоизларни таклиф қилувчи банклар пайдо бўлди.

Бу аҳолининг жамғаришга бўлган қизиқишини, онлайн жамғаришга бўлган қизиқишини кўпайтирди», — дейди Исмоли Туропов.

Суҳбатни тўлиқ қуйида томоша қилиш мумкин:

Аввалроқ Топ-10 тижорат банкларидаги омонатларнинг юқори фоиз ставкалари маълум қилинганди. Унга кўра, Ўзбекистон тижорат банкларидаги аҳоли омонатларининг юқори фоиз ставкалари 20,5 фоизни ташкил қилган.

Маълум қилинишича, банк тизимидаги топ-10 тижорат банкининг юқори фоиз ставкалари бўйича навбатдаги мониторинг ўтказилган. Аниқланишича, 2022 йил 1 март ҳолатида ушбу банклардаги аҳоли омонатларининг юқори фоиз ставкалари 20–22 фоиз атрофида шаклланиб, ўртача 21,1 фоизни ташкил қилган.