Ангрендаги шина заводи Россия компаниясига 80 млн долларга сотилди

Россиянинг «Татнефть» компанияси 80 млн долларга «Биринчи резинотехника заводи» МЧЖнинг 100 фоиз улушини сотиб олди. Россия компанияси мавжуд барча кредит мажбуриятлари ва қарздорликларни ўз зиммасига олган ҳолда, келгусида корхонада янги турдаги резинотехника маҳсулотларини ишлаб чиқаришни йўлга қўйиши маълум қилинди

Россиянинг «Татнефть» компанияси 80 миллион долларга «Биринчи резинотехника заводи» МЧЖнинг 100 фоиз улушини сотиб олди. Бу ҳақда «Ўзкимёсаноат» АЖ матбуот хизмати хабар берди.

Маълум қилинишича, 2022 йилнинг 1–2 декабрь кунлари Самарқанд шаҳрида ўтказилган Ўзбекистон—Россия бизнес-форуми доирасида олиб борилган музокаралар натижасига кўра Россиянинг «Татнефть» компанияси билан «Биринчи резинотехника заводи» МЧЖнинг 100 фоиз улушини 80 миллион долларга сотиб олиши юзасидан келишувга эришилган. Россия компанияси мавжуд барча кредит мажбуриятлари ва қарздорликларни ўз зиммасига олган ҳолда, келгусида корхонада янги турдаги резинотехника маҳсулотларини ишлаб чиқаришни йўлга қўяди.

2023 йилнинг 20 январь санасида White & Case халқаро юридик компанияси иштирокида «Биринчи резинотехника заводи» МЧЖни Россиянинг «Татнефть» компаниясига сотиш юзасидан «Ўзкимёсаноат» АЖ, «Ўзкимёимпекс» МЧЖ ҳамда «Татнефть» ОАЖ ўртасида олди-сотди шартномаси имзоланди.

«Шуни ҳам таъкидлаб ўтиш лозим, кўплаб ОАВ ва ижтимоий тармоқларда ‘Биринчи резинотехника заводи’ МЧЖ Россиянинг ‘Татнефть’ ОАЖ компаниясига 826 миллион сўмга сотилгани юзасидан ҳақиқатга тўғри келмайдиган хабарлар эълон қилинмоқда. Бунга эса www.openinfo.uz сайтига нотўғри рақамлар акс этган маълумотлар жойлаштирилганлиги сабаб бўлган. Ҳозирда йўл қўйилган хатолик бартараф этилиб, тўғри маълумотлар жойланди», дейилади ахборотда.

Эслатиб ўтамиз, Президентининг 2022 йил 10 октябрдаги қарорига асосан «Биринчи резинотехника заводи» МЧЖнинг 100 фоиз улуши катта тўртликка кирувчи (The Big Four) Deloitte компанияси томонидан ўрганиб чиқилди ва барча кредит мажбуриятлари ҳамда мавжуд қарздорликлар инобатга олинган ҳолда Deloitte компанияси томонидан завод қиймати 843 миллиард сўмга (экв. 75,0 миллион доллар) баҳоланган.

Маълумот учун, «Биринчи резинотехника заводи» МЧЖнинг 91,8 фоиз улуши «Ўзкимёсаноат» АЖга ва 8,2 фоиз улуши «Ўзкимёимпекс» МЧЖга тегишли бўлган. Шунингдек, мазкур корхонанинг жами 153 миллион АҚШ долларига тенг кредит мажбуриятлари ҳамда қарздорлиги мавжуд.

Koʻrishlar soni: 57