Аномал совуқда қийинчиликларга учраган тадбиркорларга кредит, солиқ, божхона ва бошқа тўловлар бўйича енгилликлар берилади. Бу ҳақда Шавкат Мирзиёев Наманган шаҳри «Баркамол авлод» маҳалласида тадбиркорлар билан мулоқоти чоғида маълум қилди.

Маълум қилинишича, Ўзбекистонда кузатилган аномал совуқ оқибатида 3 мингта ҳудудий саноат корхонасида 7 триллион сўмлик маҳсулот ишлаб чиқарилмаган. Жумладан, Намангандаги 367 та саноат корхонаси 500 миллиард сўмга яқин маҳсулотни ишлаб чиқара олмади.

«Ҳисоб-китобга кўра, зарур чоралар кўрилмаса, биринчи чоракда ялпи маҳсулот ўсиши 1,5 фоизгача пасайиши мумкин. Олдимизда долзарб вазифа — ‘қаттиқ совуқ’ оқибатларини бартараф этиб, бизнес фаолиятини тезроқ изга тушириш», — деди Президент.

Шу боис, иқтисодиётдаги йўқотишлар ўрнини қоплаш ва бизнесни қўллаб-қувватлаш учун Президент алоҳида қарор имзоланганини маълум қилди.

Аномал совуқдан қийинчилик кўрган тадбиркорларга кредит, солиқ, божхона ва бошқа тўловлар бўйича енгилликлар берилади.

Жумладан:

• 2 минг нафар кичик ва ўрта тадбиркорларнинг январь-мартда муддати келадиган 4,7 триллион сўм кредит тўловлари 1 июнга қадар узайтирилади;

Наманганда 73 та тадбиркорнинг 130 миллиард сўмлик кредит тўловлари узайтирилади.

• 29 мингта тадбиркорнинг 2 триллион сўм солиқдан қарзини 1 июлга қадар фоизсиз, қўшимча гаровсиз ва “пеня”сиз бўлиб-бўлиб тўлаш имконияти яратилади;

Наманганда 395 та тадбиркорнинг 17 миллиард сўм солиқ тўловлари узайтирилади.  

• қуввати пасайган 545 та саноат корхонасига ишлаб чиқаришни тиклаш ва айланма маблағ учун 8 триллион сўм кредит ажратилади;

Наманганда 44 нафар тадбиркорга 65 миллиард сўм кредит ажратилади.

• носоз ускуналарни таъмирлашга кредитлар ажратилади, улар бўйича 2,5 миллиард сўмгача кафиллик берилади ва кредит ставкасининг 4,5 фоизи қоплаб берилади;
• 27 мингта тадбиркор учун давлат мулки ижара тўлови 1 апрелга қадар ўзгармайди ва уни бўлиб-бўлиб тўлашга рухсат берилади (тадбиркорларда 52 миллиард сўм қолади);

Наманганда 183 та шундай тадбиркор бор.

• давлат мулкини сотиб олган тадбиркорлар учун тўловлар, фоиз ва “пеня” 1 апрелга қадар тўхтатиб турилади;
• ишлаб чиқариш биноларининг ҳар бир юқори қавати учун тадбиркорларга мол-мулк солиғидан 10 фоиздан чегирма берилади.

Шу билан бирга, Президент саноат ва хизмат кўрсатишни тиклаш учун республика бўйича кунига 80 миллион куб метр газ ва 126 миллион кило-ватт соат электр, бир ҳафта ичида газ қуйиш шохобчаларига кунлик 5 миллион куб метр газ етказиб берилиши (ҳозир — 1 миллион куб метр) ҳақида айтиб ўтди.

Эслатиб ўтамиз, 2023 йил 1 февралдан тадбиркорларнинг ишлаб чиқариш, хизмат кўрсатиш ва ҳунармандчилик ҳамда касаначиликни кенгайтиришга йўналтирилган лойиҳалари учун ҳоким ёрдамчилари тавсияномаси асосида ажратиладиган кредитлар миқдори амалдаги 225 миллион сўмдан 300 миллион сўмгача оширилиши ҳақида хабар берилганди. Шунингдек, 2022 йилнинг ўзида камбағаллик даражаси 17 фоиздан 14 фоизга тушгани, бунда ҳоким ёрдамчилари 1 миллион нафар аҳолини касб-ҳунарга ўқитиб, тадбиркорлигини бошлашга кўмаклашгани, даромадли иш билан банд қилгани муҳим омил бўлгани ҳақида маълум қилинди.