Тошкентда 8 февраль куни Ўзбекистон—Словения бизнес-форуми бўлиб ўтди. Бу ҳақда Инвестициялар, саноат ва савдо вазирлиги матбуот хизмати хабар берди.

Маълум қилинишича, унда Ўзбекистон делегациясига бош вазир ўринбосари Жамшид Хўжаев, Словения делегациясига эса Словения бош вазири ўринбосари — ташқи ишлар вазири Таня Файон бошчилик қилган.

Делегациялар раҳбарлари ўз сўзларида икки томонлама ҳамкорликни, жумладан, ўзаро савдо муносабатлари фаоллашаётгани, бу борада ишбилармон доираларнинг фаол ҳамкорлиги муҳим роль ўйнашини таъкидлади.

Шунингдек, ўтган йил давомида ҳажми қарийб 40 фоизга ошган ташқи савдо айланмасининг ижобий динамикаси алоҳида таъкидланди. Бу кўп жиҳатдан Ўзбекистоннинг GSP+ преференциялар тизимининг бенефициари мақомини олиши туфайли мумкин бўлди. Ташқи савдодаги кўрсаткичларни ошириш учун томонлар икки мамлакат ишбилармон доиралари учун зарур қўшимча шарт-шароитларни яратиб бериш масалалари бўйича келишиб олди. Эришилган келишувлар бизнес-форум давомида имзоланган Ўзбекистон ва Словения ўртасида Иқтисодий ҳамкорлик тўғрисидаги битимда ўз аксини топди.

Бундан ташқари, тақдимот ва ишбилармон доиралари вакиллари ўртасида кечган мулоқотларда автомобилсозлик, бутловчи қисмлар, металл буюмлар, гидравлик турбиналар, насослар, фармацевтика маҳсулотлари биргаликда ишлаб чиқаришда шериклик муносабатларини ўрнатиш истиқболлари кўриб чиқилди. Чорвачилик, боғдорчилик ва уруғчиликни ривожлантириш бўйича қўшма лойиҳаларни амалга ошириш учун агросаноат комплексини яратиш, шунингдек, Словениянинг Mercator Group йирик савдо тармоғи филиалининг Ўзбекистонда фаолиятини ташкил этиш имкониятлари муҳокама қилинди.

Тадбир якунида иштирокчилар Ўзбекистон ва Словения ўртасидаги иқтисодий ҳамкорликни янада кенгайтириш, мустаҳкам ишбилармонлик алоқаларини ўрнатиш, қўшма лойиҳа ва ташаббусларни амалга оширишда тадбиркорларни ҳар томонлама қўллаб-қувватлашга тайёрлигини билдирди.

Форум B2B ва G2B музокаралари сессияси билан давом этди, унда томонлар янги инвестициявий лойиҳаларни ишлаб чиқиш ҳамда мамлакатлар ўртасидаги амалий ҳамкорликни янги даражага чиқариш ва ривожлантиришга қаратилган мустаҳкам савдо алоқаларини ўрнатиш юзасидан фикр ва таклифлар алмашди.

Авваороқ Франциянинг Groupe Casino компанияси Тошкентда савдо тармоғини очмоқчилиги ҳақида хабар берилганди.