Осиё тараққиёт банки (ОТБ) Ўзбекистонда иқтисодий бошқарувни такомиллаштириш учун 150 миллион долларлик кредит ва 400 минг долларлик грант ажратишни маъқуллади, деб хабар қилди банк матбуот хизмати.

Маълум қилинишича, ОТБнинг 2-босқич Иқтисодий бошқарувни такомиллаштириш дастурининг биринчи кичик дастури ОТБнинг давлат сектори бошқаруви ислоҳотларини илгари қўллаб-қувватлашини давом эттиради ва чуқурлаштиради.

Дастур Ўзбекистон ҳукуматига ҳуқуқий, меъёрий ва институционал базани ислоҳ қилишда кўмак беради. У молиявий бошқарувнинг самарадорлиги ва шаффофлигини ошириш, давлат корхоналарини бошқариш ва фаолиятини яхшилаш, шу жумладан рақобатни рағбатлантириш мақсадида монополияга қарши тизимлар ҳамда мустаҳкам коррупцияга қарши курашиш ва аудит тизимлари орқали давлат сектори масъулиятини оширишга қаратилган.

Биринчи кичик дастур доирасидаги ислоҳотлар фискал рисклар ва давлат қарзларини бошқаришни кучайтириш, гендерга мос бюджет ва «яшил» бюджет орқали давлат ресурсларини тақсимлашни такомиллаштиришга қаратилган. Бундан ташқари, улар IT’га асосланган солиқ маъмуриятчилиги орқали «ички ресурсларни сафарбар қилишни яхшилаш»ни мақсад қилган. Ислоҳотлар, шунингдек, ижтимоий ҳимоя қамровини кенгайтиради, коррупцияга қарши курашиш ва аудит тизимлари самарадорлигини оширади.

Шунингдек, дастур Ўзбекистоннинг «яшил» иқтисодиётга ўтиш стратегиясини ишлаб чиқиш ва амалга оширишни ҳам қўллаб-қувватлайди.

«Аниқ миллий режа ҳукуматга Париж келишуви бўйича ўз мажбуриятларини бажаришга, инфратузилмани модернизация қилишга ва ишчи кучини «яшил» иш ўринлари учун зарур бўлган кўникмаларга ўқитишга ёрдам беради», дейилади хабарда.

Шу билан бирга, 400 минг долларлик техник ёрдам гранти ўз навбатида ислоҳотларни амалга оширишга ёрдам беради.

Германиянинг Graess Energy Uzde компанияси Сурхондарё вилояти Жарқўрғон туманида инновацион фотоэлектр станциясини барпо этишга 500 миллион доллар маблағ ажратиши ҳақида хабар берилганди.