O‘zbekistonliklar uchun chet elda 154 mingdan ortiq bo‘sh ish o‘rinlari mavjud bo‘lib, ularning maoshi 2,5 ming dollargacha boradi, deb xabar bermoqda Kambagʻallikni qisqartirish va bandlik vazirligi.

Ma‘lum qilinishicha, o‘zbekistonlik fuqarolarga Germaniya, Janubiy Koreya, Turkiya, Litva, Buyuk Britaniya, Polsha, Latviya, Yaponiya va Ruminiyada tibbiyot, ishlab chiqarish, xizmat ko‘rsatish, qurilish, qishloq xo‘jaligi va IT sohalarida bo‘sh ish o‘rinlari bor.

Masalan, Germaniya bilan 60 ming fuqaroni ish bilan ta’minlash bo‘yicha kelishuvga erishilgan bo‘lib, ish haqi 2,1 ming dollarni tashkil qilishi mumkin.

Buyuk Britaniya tibbiyot sohasida 10 ming va qishloq xo‘jaligida 3 ming bo‘sh ish orinlarini 2,5 ming dollar maosh bilan taklif qilgan. Janubiy Koreya esa 13,7 ming ish joyiga kvotalar ajratib 2 ming dollargacha maosh to‘lashga tayyorligini bildirgan.

Litva, Latviya, Polsha, Bolgariya va Yevropaning boshqa davlatlariga 26 mingdan ortiq fuqaroni yuk avtomobili haydovchisi, ishlab chiqarish, qurilish va xizmat ko‘rsatish sohalariga ishga joylashtirish bo‘yicha loyihalar amalga oshirilmoqda. Ularga o‘rtacha 1,4 ming dollar taklif qilinmoqda.