Toshkent shahrining Yunusobod tumanidagi mavjud bozor o‘rnida uch qavatli ekobozor, savdo markazi, ofislar, yerosti avtoturargoh, tomida esa restoranlar va yashil hududlardan iborat zamonaviy kompleks barpo etiladi.Prezident matbuot xizmatining xabar berishicha, ushbu loyiha 11-dekabr kuni Prezident Shavkat Mirziyoyevga taqdim etildi.

Yunusobod bozorining hozirgi joylashuvi savdo maydonlari uchun torlik qilayotgani va atrofdagi yo‘llarda tirbandliklar yuzaga kelayotgani sababli, yangi loyiha asosida bozorni zamonaviy talablarga mos ravishda yangilash va kengaytirish rejalashtirilmoqda. Bozorni yuqori qavatlarga ko‘tarish, savdo maydonlarini kengaytirish va fuqarolar uchun qulayliklarni oshirish maqsadida mazkur loyiha taklif etilgan.

Loyihaga ko‘ra, eski bozor o‘rnida 3 qavatli ekobozor qurilishi ko‘zda tutilgan. Uning yonida savdo markazi va zargarlik uyi ham tashkil etiladi. Yangi majmuaning yerosti qismida 1000 dan ortiq avtomobil sig‘adigan avtoturargoh bo‘ladi. Shuningdek, 4000-5000 ta yangi ish o‘rni yaratilishi kutilmoqda. Turkiyalik dizaynerning so‘zlariga ko‘ra, yangi binoda ofislar va savdo joylari ham qurilishi rejalashtirilgan.

Prezident Shavkat Mirziyoyevning ko‘rsatmasiga binoan, loyiha bosqichma-bosqich amalga oshiriladi, bu esa bozor faoliyatining uzluksizligini ta’minlashga xizmat qiladi. Qurilish jarayonida mavjud bozordagi savdo ishlari to‘xtatilmaydi.

Yangi kompleksda turli tijorat va ijtimoiy inshootlar barpo etiladi. Yangi binoda ofislar va savdo maydonlari bo‘lishi bilan birga, bolalar uchun batut markazi ham ochiladi. Savdo markazining umumiy maydoni 20 000 kvadrat metrni tashkil etadi. Tomda restoranlar va boshqa dam olish joylari joylashadi, atrofdagi hududda esa yashil maydonlar barpo etiladi.