12-dekabr kuni bo‘lib o‘tgan Markaziy bank boshqaruvi yig‘ilishida asosiy stavka o‘zgartirilmay, 13,5% darajasida saqlab qolinishi to’g’risida qaror qabul qilindi.

So‘nggi oylarda inflyatsiya sur’ati pasaygan bo‘lsa-da, oziq-ovqat mahsulotlari narxlarining barqarorligi inflyatsiyaning umumiy darajasiga sezilarli ta’sir ko‘rsatmoqda. Yalpi talabning o‘sishi, xizmatlar va nooziq-ovqat tovarlari narxlarining oshish xavfi saqlanib qolmoqda. Bu esa o‘z navbatida inflyatsion kutilmalarning yuqoriga ko‘tarilishiga sabab bo‘lmoqda.

Iqtisodiy faollik va ish haqi o‘sishining ta’siri ostida aholi daromadlari ortgan. Bu, ayniqsa, xizmatlar va nooziq-ovqat tovarlari narxlarining oshishiga ta’sir ko’rsatadi.

Pul-kredit sharoitlarining qat’iyligini saqlab qolish orqali inflyatsion jarayonlarni boshqarish ko‘zda tutilgan. Bank tizimidagi yuqori real foiz stavkalari jamg‘armaga moyillikni oshirib, inflyatsiyaga bo‘lgan ta’sirni yumshatishga ko‘maklashadi. Kreditlash va omonatlar o‘sishi inflyatsiya jarayonlariga ta’sirini maqbullashtiradi.

O‘rta muddatli istiqbolda inflyatsiya darajasini 5 foizgacha pasaytirish uchun pul-kredit siyosatini yanada qat’iylashtirish rejalashtirilmoqda. Iqtisodiyotdagi talab va taklif muvozanati, inflyatsion kutilmalar hamda tarkibiy islohotlar sur’atlariga alohida e’tibor qaratiladi.

Iqtisodiy faollik va yuqori narx bosimi kelgusi choraklarda yana kuchayishi mumkin. Agar talab yuqori darajada saqlanib qolsa, Markaziy bank asosiy stavkani oshirishni ko‘rib chiqishi mumkin. Yalpi ichki mahsulot o‘sishi yil yakunida 6-6,5 foiz atrofida bo‘lishi kutilmoqda.