11-dekabr kuni Oliy Majlis Qonunchilik palatasida «Kredit axboroti almashinuvi to‘g‘risida»gi qonun loyihasi birinchi o‘qishda qabul qilindi.  Ushbu loyiha jismoniy shaxslar va kredit byurosi o‘rtasida ariza berish orqali fuqarolarga o‘z nomiga kredit rasmiylashtirilishini taqiqlash imkonini beradi. Qonunda, shuningdek, kredit bitimlarini tuzish taqiqlangan shaxslar ro‘yxatini yaratish ham ko‘zda tutilgan.

Markaziy bank raisi o‘rinbosari Abrorxo‘ja Turdaliyevning ta’kidlashicha, yangi qonun fuqarolarni noqonuniy kreditlashdan himoya qilishga va kredit byurolari faoliyatini tartibga solishga qaratilgan. Bugungi kunda fuqarolardan xabarsiz ravishda kredit rasmiylashtirish orqali mablag‘lar o‘zlashtirilishi holatlari ko‘paymoqda. Loyihada fuqarolarga ixtiyoriy ravishda kredit olishdan voz kechish mexanizmini joriy etish taklif etilmoqda.

Kredit bitimlarini tuzishni taqiqlash uchun jismoniy shaxslar kredit bitimlarini tuzishni taqiqlovchi reyestrga kiritilishi mumkin. Bu reyestrni Markaziy bank kredit byurolari orqali yuritadi va banklar hamda nobank kredit tashkilotlariga reyestrni tekshirmasdan bitimlar tuzish taqiqlanadi. Agar fuqarolarga xabarsiz ravishda kredit shartnomasi tuzilsa, bitim bo‘yicha kelib chiqadigan oqibatlar uchun banklar va mikromoliyaviy tashkilotlar javobgarlikni o‘z zimmasiga oladi.

Kredit byurolarining ustav kapitalining minimal miqdori 2 milliard so‘m etib belgilanishi, shuningdek, ularning qoidabuzarliklari uchun 5 ming baravari (1,875 milliard so‘m) miqdorida jarima undirilishi nazarda tutilgan. Ushbu choralar va sanksiyalar qonun loyihasining bir qismi sifatida kiritilmoqda.

Fuqarolar kredit rasmiylashtirishni taqiqlash yoki ushbu taqiqni bekor qilish to‘g‘risidagi arizani Yagona portal (my.gov.uz) orqali elektron shaklda, shuningdek, davlat xizmatlari markazlari yoki kredit byurolari orqali taqdim etishlari mumkin. Ariza berish jarayoni ixtiyoriy bo‘lib, xizmatlar Vazirlar Mahkamasi tomonidan belgilangan tartibda pullik asosda ko‘rsatiladi.