Shavkat Mirziyoyev raisligida tadbirkorlikni har tomonlama qo‘llab-quvvatlash bo‘yicha joriy yil yakunlari va kelgusi yil uchun asosiy rejalar muhokama qilindi. Yig‘ilishda tadbirkorlikni rivojlantirish uchun amalga oshirilgan islohotlar va ko‘zda tutilgan loyihalar yuzasidan kengaytirilgan rejalar taqdim etildi.

Yil yakunida ajratilgan jami kreditlar 275 trillion so‘mni tashkil etgan bo‘lib, 2025-yilda bu raqam 300 trillion so‘mdan oshishi kutilmoqda. Kelgusi yildan kichik biznesga beriladigan kreditlar ulushi 28 foizdan 40 foizga oshirilib, 120 trillion so‘mga yetkaziladi. Shuningdek, banklar kelgusi yilda chetdan davlat kafolatisiz 6 milliard dollar jalb qilishni rejalashtirmoqda.

2025-yilda 43 trillion so‘m infratuzilma obyektlarini yaxshilashga yo‘naltirilishi, 6,4 milliard dollarlik 25 ta loyiha doirasida 4,8 gigavatt yangi quvvatlar barpo etilishi ko‘zda tutilgan. Elektr energiyasining onlayn ulgurji bozori ham kelgusi yilda ishga tushirilishi kutilmoqda. Kelgusi yildan kichik biznesga beriladigan kreditlar ulushi 28 foizdan 40 foizga oshirilib, 120 trillion so‘mga yetkaziladi. Shuningdek, banklarimiz chetdan davlat kafolatisiz 6 milliard dollar jalb qilishni rejalashtirmoqda.

Turizm sohasida kelgusi yilda 30 mingta yangi mehmon o‘rni yaratish rejalashtirilgan bo‘lib, bunda tadbirkorlar 10 trillion so‘m investitsiya kiritishga tayyorligini bildirgan. Yana 25 ta yirik savdo va turistik maskan ishga tushiriladi. «Sea Breeze» nomli yirik markaz qurilishiga start beriladi. Bundan tashqari, mamlakatimizda Swissôtel, Sheraton, Ritz-Carlton, Novotel, Pullman, Marriott, ibis va Mercure kabi nufuzli mehmonxona brendlarining ham ochilishi haqida ma’lumot berildi. Yil davomida savdoni rivojlantirish uchun yana 300 million dollar ajratilishi ko‘zda tutilgan.

Kelgusi yilda tadbirkorlarga 4,5 mingta bino va 6 ming gektar yer beriladi. 3 ming kilometr yo‘lni saqlash ishlari tadbirkorlarga topshiriladi. «Tashabbusli byudjet» doirasida yo‘llarni ta’mirlash ishlarining 100 foizi xususiy pudratchilar tomonidan amalga oshiriladi. Osiyo Taraqqiyot Banki ishtirokida 86 ta tuman hududida 841 kilometr yo‘l quriladi, bu ishlar ham to‘liq mahalliy pudratchilar tomonidan bajariladi.

Shuningdek, kelgusi yilda, 1-yanvardan boshlab, yer yoki davlat mulki QQSsiz sotiladi, mobil aloqa uchun aksiz solig‘i (10 foiz) bekor qilinadi. Shahar chegarasidagi qishloq yerlariga ikki karra yer solig‘i hisoblash to‘xtatiladi. IT-park rezidentlariga barcha turdagi soliqlardan ozod etish imtiyozlari uzaytiriladi. Xususiy maktablar va bog‘chalarga, shuningdek, xorijiy o‘qituvchilar va mutaxassislarga berilgan barcha soliqlar bo‘yicha imtiyozlar 2030-yilgacha amal qilishi aytib o‘tildi.

Kelasi yilda yalpi ichki mahsulotni 120 milliard dollarga, eksportni 30 milliard dollarga yetkazish, investitsiyani 42 milliard dollardan oshirish, 5 million aholini ish bilan ta’minlash va 1,5 million kishini kambag‘allikdan chiqarish rejalashtirilgan. Shuningdek, tarmoqlarni rivojlantirish va ijtimoiy sharoitlarni yaxshilash uchun chora-tadbirlar ishlab chiqilgan. To‘qimachilik va charm sohalarida, kamida 2,5 million so‘m oylik to‘lovchi, 15 foiz ishchisi ehtiyojmand oiladan bo‘lgan tadbirkorlar uchun imtiyozlar taqdim etiladi. Bunday korxonalar uchun foyda va daromad soliqlari 1 foizga teng bo‘ladi, bu esa 50 ming ehtiyojmand odamni ishga olish imkonini beradi.