Toshkent viloyatiga 2025-yilda $5 milliard miqdorida investitsiya jalb qilinishi rejalashtirilmoqda
Toshkent viloyatiga kelgusi yilda 5 milliard dollar miqdorida investitsiya jalb qilinishi kutilmoqda. Investitsiyalarning asosiy qismi kam rivojlangan hududlarga yo‘naltirilishi va yangi loyihalar orqali 700 ming ish o‘rni yaratilishi ko‘zda tutilgan.
Prezident Shavkat Mirziyoyev 10-dekabr kuni Toshkent viloyatida yangi imkoniyatlar yaratish, ish o‘rinlari soni va investitsiyalarni ko‘paytirish masalalari yuzasidan yig‘ilish o‘tkazdi. Bu haqda prezident matbuot xizmati xabar berdi.
2017-yildan buyon viloyat iqtisodiyoti 1,5 barobar o‘sgan, sanoat korxonalari soni esa ikki barobar ortib, 12 mingta korxonani tashkil etgan. Biroq, viloyat salohiyati to‘liq amalga oshirilmagan. Masalan, qishloq xo‘jaligi sohasida yer maydonining faqat 25 foizi samarali foydalanilmoqda va o‘rtacha daromad ko‘rsatkichlari past darajada qolmoqda.
Viloyatdagi fermer va dehqon xo‘jaliklarini yagona «Agroplatforma» tizimiga kiritish rejalashtirilgan bo‘lib, tizim ekin maydonlari, mahsulot hajmi, xodimlar soni va soliq to‘lovlari kabi ma’lumotlarni qamrab oladi. Yiliga uch marta meva-sabzavot yetishtirish uchun 52 ming gektar yer maydoni ajratilishi va 5 ming gektarda sanoat bog‘lari tashkil etilishi ko‘zda tutilgan. Bundan tashqari, fermerlar va qayta ishlash hamda eksport korxonalari bilan hamkorlikda yiliga 3,5 million tonna meva-sabzavot mahsulotlari ishlab chiqarish, shuningdek, 500 million dollarlik eksport qilish imkoniyatlari mavjud.
Toshkent viloyatidagi iqtisodiy o‘sish poytaxtdan 3,5 barobar pastligi ta’kidlangan. Hozirgi kunda investitsiya loyihalari uchun ajratilgan 9 ming gektar yer maydonidan faqat 2 ming gektari ishlatilishi aytildi. Viloyatda «aqlli» shaharlar, tibbiyot klasterlari va «yashil» elektr stansiyalari qurilishi uchun investorlar qiziqish bildirayotganligi haqida xabar berilgan.
Viloyat hokimi Zoir Mirzayevning taqdim etishicha, 5 milliard dollarlik investitsiya jalb qilish va eksportni 2 milliard dollarga yetkazish rejalari mavjud. Ushbu investitsiyalarning yarmi Olmaliq, Angren, Chirchiq, Ohangaron, Zangiota va Qibray kabi rivojlangan hududlarga yo‘naltirilishi ko‘zda tutilgan.
Shu bilan birga, kam rivojlangan hududlar, jumladan, Bekobod, Parkent, Piskent va Chinoz shaharlarida yangi loyihalar ishlab chiqilishi zarurligi ta’kidlangan. Bunda, 700 ming ish o‘rni yaratish va 22 mingta oilani kambag‘allikdan chiqarish maqsad qilib qo‘yilgan. Kambag‘allik darajasi esa 7,2 foizdan 4 foizgacha pasaytirish rejalashtirilgan.
