Qo‘mita xabariga ko‘ra, ijtimoiy tarmoqlarda, xususan, “Telegram”dagi kanallar va guruhlar orqali BFQlar, malhamlar, surtmalar va boshqa mahsulotlar davosi qiyin kasalliklarning yechimi sifatida reklama qilinib, bu mahsulotlar “ming bir xastalikka davo” va “mo‘jizakor” vosita sifatida ko‘rsatilmoqda. Ushbu bo‘rttirilgan va yolg‘on ma’lumotlar iste’molchilarning o‘z-o‘zini davolashga o‘tishi va rejali tibbiy davolashdan voz kechishiga olib kelmoqda.

Odamlarda noto‘g‘ri taassurot shakllantirilishiga sabab sifatida diniy blogerlar suratlari va ular ishtirokidagi videolardan foydalanib, mahsulotlarni tavsiya qilish yoki davolash xususiyatlari haqida dalillar keltirilishi aytilgan.Bu esa iste’molchilarning salomatligiga zarar yetkazishi mumkin.

Shu paytga qadar biologik faol qo‘shimchalarni iste’mol qilish oqibatida sog‘lig‘i yomonlashgan fuqarolar tomonidan ko‘plab murojaatlar kelib tushgan. Qonunchilikka muvofiq, bunday mahsulotlarning reklamalari dori vositalari sifatida targ‘ib qilinmasligi kerak. Ularning dori emasligi haqida alohida ogohlantirish berilishi shart.

“Reklama to‘g‘risida”gi qonunning 47-moddasiga asosan, BFQlarning noto‘g‘ri reklamasi uchun 11,25 mln so‘m jarima belgilangan. Raqobat qo‘mitasi ushbu qoidalarni buzgan shaxslar qonuniy javobgarlikka tortilishini eslatmoqda.

Eslatib o’tamiz: Avvalroq Raqobat qo‘mitasi dorixonalar tomonidan 7 mlrd so‘mlik asossiz mablag‘ olish holatlarini aniqlagan edi.