Россияда мигрантларнинг банк ҳисобрақамларини оммавий блоклаш бошланди
Россияда 5 февралдан «назорат остидаги шахслар» реестри ишга тушди. Унга мамлакат ҳудудида ноқонуний бўлиб турган чет эл фуқаролари киритилади. Аммо охирги кунларда қонуний равишда РФ ҳудудида ишлаётган хорижликлар ҳам рўйхатга киритилиб, уларнинг ҳисобрақамлари блокланмоқда.
Россияда юзлаб хорижий фуқароларнинг банк ҳисоблари «назорат остидаги шахслар» реестрига киритилганидан кейин блокланди. Бу ҳақда Baza жабрланган шахсларга таяниб хабар берди.
Қайд этилишича, ҳисобрақамлари блокланган чет эл фуқароларининг барчаси Россияда қонуний асосийда яшайди. Меҳрожбек исмли жабрланувчининг айтишича, Россияда икки йилдан бери истиқомат қилиб келади, расмий иш жойига эга, қонуний маош олади ва яшаш гувоҳномаси мавжуд. Шунга қарамай, у «назорат остидаги шахслар» рўйхатига киритилган ва энди ўз маблағларидан эркин фойдалана олмаяпти: реестрга киритилган шахсларга бир ойда касса орқали 30 минг рублдан ортиқ пул ечиб олишга рухсат этилмайди.
Шу каби ҳолат 2013 йилдан Россияда яшаб келадиган Инна исмли шахсда ҳам кузатилган. Унинг сўзларига кўра, аёл ҳеч қачон ўтиш муддатини ўтказиб юбормаган ва миграция қоидаларига бўйсунган. Аммо 6 февраль кечаси унинг банк ҳисобрақами блокланган. «Т-Банк» бунга аёлнинг реестрга киритилгани сабаб бўлганини, тафсилотларни билиш учун ИИВга мурожаат қилиш кераклигини айтишган. Идоранинг расмий жавоби эса 30 кунгача чўзилиши мумкин, бу муддат давомида жабрланган фуқаролар ўз маблағларидан деярли фойдалана олмайди.
Ҳуқуқ ҳимоячиси Валентина Чупикнинг таъкидлашича, унга икки кун ичида «назорат остидаги шахслар» рўйхатига хатолик туфайли киритилган 31 кишидан мурожаат келиб тушган. Уларнинг 17 нафари ҳисоблари блокланганидан шикоят қилган, тўрт нафарини полиция қўлга олган, яна тўрт нафари Россияга киритилмаган, бир нафар чет эл фуқаросини эса иш жойидан бўшатиб юборишган.
Россияда «назорат остидаги шахслар» реестри 5 февралдан ишга тушди. Расмий концепцияга кўра, унга мамлакатда ноқонуний равишда бўлиб турган чет эл фуқаролари киритилиши керак. Мамлакатда қолиш учун рухсат берадиган ҳужжатлар муддати ўтганлиги, визаларнинг бекор қилиниши, бошпана тақдим этиш учун рад жавобини олиш, РФ ҳудудидан чиқариб юборишга оид маъмурий жавобгарликар, депортация тўғрисидаги қарор, чегарани ноқонуний кесиб ўтиш ва бошқа турдаги миграция қонунчилигининг бузилиши реестрга киритилишига сабаб бўлиши мумкин.
