Grok 3 — бу xAI томонидан ишлаб чиқилган чат-ботнинг янада ривожланган версияси бўлиб, ишлаб чиқувчиларнинг таъкидлашича, у «оламнинг табиатини тушунишга ёрдам беради». Илон Маскнинг айтишича, модель кенгайтирилган маълумотлар тўпламидан фойдаланган ҳолда ўқитилган бўлиб, унга ҳатто суд ҳужжатлари ҳам киритилган.

Янги модел иккита модификацияда тақдим этилди: Grok 3 Reasoning ва Grok 3 mini. Бундан ташқари, модел мураккаб вазифалар ҳамда ахборотни чуқурроқ қидиришга мўлжалланган Big Brain ва Deep Search функцияларига эга.

Нейротармоқ 200 мингта Nvidia H100 чипларидан фойдаланган ҳолда Colossus «гигакомпютери»да такомиллаштирилган Маскнинг сўзларига кўра, Grok 3 ўзидан олдинги моделдан ўн баробар кучли. Компания ходимлари ўтказган тестлар давомида Grok 3 асосий рақобатчилари — GPT-4о, Claude 3.5 Sonnet, Gemini-2 Pro ва DeepSeek-V3’ни ортда қолдирган.

Grok 3 моделлари имкониятлари

Янги нейротармоқ ўзидан олдинги версиялар каби тасвирларни таҳлил қилиш ва саволларга жавоб бериш қобилиятига эга. Бундан ташқари, Grok 3 қуйидагиларни ҳам бажара олади:

• математика ва дастурлаш бўйича масалаларни ечиш, илмий тадқиқотлар ўтказиш;
• мураккаб ҳисоб-китобларни амалга ошириш. Тақдимот чоғида чатбот ракетанинг Марсга учирилиш ва Ерга қайтиш вақтини барча омилларни ҳисобга олган ҳолда аниқлади;
• «мулоҳаза юритиш» ва натижаларни чиқаришдан олдин ўзини текшириш – OpenAI’нинг o3-mini ва DeepSeek R1’нинг моделларига ўхшаш тарзда;
• Big Brain режимини фаоллаштириш – бу қўшимча ҳисоб-китобларни талаб қилувчи таҳлиллар учун ишлайди;
• Deep Search режимида ишлаш – интернетдан керакли маълумотларни излаш ва уларни таҳлил қилиш;
• ўйинлар яратиш – тақдимотда сунъий интеллект «уч қаторли» механикага эга «Тетрис» вариантини намойиш этди.

Ишлаб чиқувчиларнинг айтишича, модель янада такомиллашишда давом этади. «Биз ижодкорликнинг илк белгилари пайдо бўлаётганини кўряпмиз», — деди Илон Маск.

Grok 3 нинг барча функцияларидан фойдаланиш учун ойига 30 доллар турадиган SuperGrok обунасини расмийлаштириш керак бўлади.