Ўзбекистон январь ойида дунёдаги энг йирик олтин харидорига айланди, дея хабар берди Жаҳон олтин кенгаши (WGC).

Таъкидланишича, 2025 йил бошида жаҳон марказий банклари томонидан 18 тонна олтин харид қилинди WGC’га кўра, қимматбаҳо металларга бўлган ҳозирги талаб марказий банклар захираларидаги олтиннинг стратегик аҳамиятини акс эттирмоқда — айниқса, геосиёсий хавф-хатарлар кучайган шароитда.

Ўзбекистон Марказий банки 8 тонна олтинни соф сотиб олишни амалга оширган. Натижада қимматбаҳо металлнинг халқаро захиралардаги улуши 82 фоизга ёки 391 тоннага кўтарилган.

Соф олтин сотиб олиш бўйича иккинчи ўринни 5 тонна билан Хитой банки эгаллаган. Январь ойи охирида Хитой захираларидаги қимматбаҳо металл ҳажми 2285 тоннани (умумий активларнинг 6 фоизи) ташкил этган. Учликни 4 тонна олтин сотиб олган Қозоғистон Марказий банки якунлаган. Кейинги ўринларни Полша ва Ҳиндистон (3 тоннадан), Чехия (2 тонна) ва Қатар (1 тонна) эгаллаган.

Қимматбаҳо металл асосий сотувчилари рўйхатига Россия, Иордания (ҳар бири 3 тоннадан) ва Қирғизистон (2 тонна) тартибга солувчи органлари киритилган.

Январь ойида Ўзбекистоннинг халқаро активлари 1,72 миллиард долларга кўпайиб, 43 миллиард долларлик энг юқори кўрсаткичга яқинлашганди. Олтин захирасининг қиймати 35 миллиард доллардан ошиб, янги рекордни қайд этган эди. Шу билан бирга, валюта захиралари сезиларли даражада камайган.