Марказий банк фуқароларни Тезкор тўловлар тизимига улашни режалаштирмоқда. Бу ҳақда 11 апрель куни бўлиб ўтган медиа-мулоқотда Марказий банкнинг Тўлов тизимлари департаменти раҳбари ўринбосари Миразиз Мирҳаётов маълум қилди.

Миразиз Мирҳаётов Spot мухбирининг картадан картага пул ўтказмалари учун комиссия олинмайдиган миқдорни белгилаш ҳақидаги саволига жавобан, кўплаб банклар ва тўлов ташкилотлари аллақачон фоизсиз п2п ўтказмаларини таклиф қилаётгани, фуқаролар эса телефонга турли мобил иловаларни ўрнатиш орқали фойдаланаётганини айтди.

Марказий банк департаменти директори ўринбосари банклар ва тўлов сервислари иловаларидаги тарифларни марказлашган ҳолда бошқаришга қарши чиқиб, бундай амалиёт 2017 йилгача қўлланилганини таъкидлади.

«Агар комиссиясиз ўтказмалар мажбурий жорий этилса, бу хизматнинг ривожланишига тўсқинлик қилади. Масалан, банкоматлардан ёки п2п ўтказмалардан пул ечишда комиссияни бекор қилиш мобил иловаларнинг ишлашига салбий таъсир кўрсатиши ёки бошқа муаммоларни келтириб чиқариши мумкин. Биз [комиссияларнинг] бозор нархлари ва рақобат тарафдоримиз», — деди у.

Мирҳаётовнинг қайд этишича, Марказий банкда жисмоний шахсларни ҳозирда юридик шахслар ва якка тартибдаги тадбиркорлар фойдаланаётган Тезкор тўловлар тизимига улаш бўйича «режалар мавжуд». Унинг сўзларига кўра, бундай тизимни яратиш ижтимоий соҳага йўналтирилади.

Ушбу режалар амалга оширилган тақдирда, Марказий банк комиссияларни белгилаш бўйича таклифларни илгари суриши мумкин. Бироқ, таклиф этилаётган тарифлар соғлом рақобатга ва бозорнинг бошқа иштирокчиларига таъсир қилмаслиги керак, бу «нозик масала», дея таъкидлади Мирҳаётов.

Марказий банк маълумотларига кўра, 2024 йилда бизнесга узлуксиз ҳисоб-китоб қилиш имконини берувчи Тезкор тўловлар тизими орқали 917,9 трлн сўмлик 47,6 млн транзакция амалга оширилган. Иккала кўрсаткич ҳам 2023 йилга нисбатан ярмидан кўпроққа ошган.