Президент фармони билан чет эл фуқаролари ва фуқаролиги бўлмаган шахсларга тўлов эвазига яшаш гувоҳномаси беришни соддалаштирилади.

Яшаш рухсатномаси ариза берувчига 200 минг долларга, унинг яқин қариндошларига (турмуш ўртоғи, ота-онаси, фарзандлари) эса 100 минг долларга берилади. Ҳужжат 5 йил давомида амал қилади. Янги тартиб жорий йилнинг 1 июнидан кучга кириши кутилмоқда.

2019 йилдан бери Ўзбекистонда 109 та давлат фуқароларига кўчмас мулк харид қилиш орқали яшаш рухсатномасини олиш дастури амал қилмоқда.

Дастур ишга туширилган пайтда уй-жой нархи жойлашувига қараб 100 минг доллардан 400 минг долларгача бўлиши керак эди — энг юқори нарх Тошкент шаҳри ва Тошкент вилояти учун белгиланган.

2022 йилда президент Тошкентда вақтинчалик яшаш рухсатномасини расмийлаштириш учун талаб қилинадиган кўчмас мулк нархини 300 минг долларгача пасайтирди. Ўша вақтда чет элликлардан яшаш учун рухсатнома талаб қилинмаган ҳолда, ҳудудларда 70 минг доллардан, Тошкентда эса 150 минг доллардан юқори қийматга эга кўчмас мулкларни сотиб олишларига рухсат берилди.

2022 йилнинг кузида Инвестициялар ва ташқи савдо вазирлиги мамлакат иқтисодиётига камида 1 миллион доллар сармоя киритган чет элликларга Ўзбекистон фуқаролигига соддалаштирилган қабулни жорий этишни таклиф қилган эди.

2024 йил август ойида «олтин паспорт» масаласи яна бир бор кўтарилган эди. Президентнинг тадбиркорлар билан очиқ мулоқотида юқоричирчиқ Energy Systems компанияси асосчиси Азиз Алимов мамлакат иқтисодиётига 10−15 млн доллар сармоя киритган инвесторлар учун Ўзбекистон фуқаролигини олиш имкониятини яратишни таклиф қилганди.