АҚШ президенти Доналд Трамп томонидан бошланган савдо уруши глобал компанияларга 34 миллиард доллар йўқотилган фойда ва кўпроқ харажатларга олиб келди, деб ёзди Reuters ўз ҳисоб-китобларига таяниб.

Агентликнинг ёзишича, бу миқдорнинг ошиши кутилмоқда, чунки АҚШ тарифлари бўйича ноаниқлик дунёдаги энг йирик корпорацияларнинг қарорларига таъсир қилишда давом этмоқда.

Reuters агентлиги S&P 500, Европанинг Stoxx 600 ва Япониянинг Nikkei 225 компаниялари маълумотларини кўриб чиқди. Аниқланишича, камида 42 компания ўз даромадлари бўйича прогнозларини пасайтирган, 16 таси эса уларни қайтариб олган. Улар орасида Apple, Ford, Porsche, Sony, Walmart, Volvo Cars ва бошқалар бор. Кўпчилик Трампнинг савдо сиёсатининг «олдиндан айтиб бўлмайдиган табиати» харажатларни тўғри баҳолашни имконсиз қилганини айтди.

Трамп 2 апрелни Америка иқтисодиёти учун «озодлик куни» деб эълон қилган ва 180 дан ортиқ давлатдан импорт маҳсулотларга 10 фоизлик божлар жорий қилганди. Ўнлаб мамлакатларга, жумладан, АҚШнинг энг яқин савдо шерикларига нисбатан «ўзаро», юқори тарифлар жорий этилди. Кейинчалик Трамп ушбу мамлакатлар билан савдо битимлари тузиш учун «ўзаро» тарифларни 90 кунга тўхтатиб, фақат асосий 10% божни қолдирди.

Бироқ АҚШнинг якуний савдо келишувлари қандай кўринишга эга бўлиши ҳали ҳам номаълум, таъкидламоқда Reuters. Бундай шароитда, деб ёзади агентлик, компаниялар таъминот занжирларини мустаҳкамлашга интилади, ниаршоринг амалиётига мурожаат қилади ва янги бозорларга устунлик беради.

28 май куни АҚШ Халқаро савдо суди Трампни импортга божлар жорий қилиш орқали ўз ваколатларини ҳаддан ташқари ошириб юборди, деб қарор қилди ва уларнинг аксариятини блоклади. Аммо апелляция суди бу қарорни бекор қилди ва кўплаб ставкаларни вақтинча тиклади.