Май ойида истеъмол секторидаги товарлар ва хизматлар нархлари ўртача 1,5 фоизга ошди. Бу ҳақда Статистика қўмитаси шарҳида маълум қилинди.

Истеъмол секторидаги нархлар 2025 йилнинг май ойида йиллик ИНИ 108,7 фоизни ташкил этиб, жорий йилнинг апрель ойига (110,1 фоиз) нисбатан 1,4 фоиз бандга пасайди.

2025 йилнинг май ойида истеъмол нархлари индекси таркибида озиқ-овқат маҳсулотлари нархлари ўртача 0,8 фоизга пасайди, ноозиқ-овқат товарлари 1,7 фоизга ва аҳолига пуллик хизматлар кўрсатиш нархлари ўртача 5,9 фоизга ошгани кузатилган.

Мазкур ҳисоб-китобларни амалга ошириш учун 10 мингдан ортиқ савдо нуқталари ва хизмат кўрсатиш объектларида 170 мингга яқин нархлар қайд этилган.

Май давомида озиқ-овқат маҳсулотлари 0,8 фоиз арзонлашган бўлса, ноозиқ-овқат маҳсулотлари 1,7 фоиз, хизматлар нархи 5,9 фоиз қимматлашган.

«Бундай ҳолат кўп жиҳатдан коммунал хизматлар соҳасидаги тарифларни оширилиши билан боғлиқ бўлди», дейилади қўмита шарҳида.

Инфляция даражаси Фарғона, Хоразм вилоятлари ва Қорақалпоғистонда юқори ўсган. Ўртача кўрсаткичдан баланд бўлган йиллик инфляция Қашқадарё, Фарғона ва Хоразм вилоятлари ҳамда Тошкент шаҳрида қайд этилган.

Қўмита таҳлилида 2025 йил май ойидан бошлаб, аҳоли учун электр энергияси ва газ нархи оширилганини ҳам эслаб ўтилган. Бунда республика бўйича ток нархи ўртача 18,8 фоизга, газ 39,2 фоизга қимматлашгани келтирилган. Шу билан бирга, бир ой ичида метан нархи 27 фоизга, маиший истеъмолдаги суюлтирилган газ тарифи эса 25 фоизга кўтарилган.

Май ойида бензин ва пропан нархларида 0,1-2,7 фоиз оралиғида тушиш кузатилган. Автомобиль транспорти хизматлари 2,4 фоизга, темирйўл транспорти хизматлари 0,1 фоизга қимматлашган. Ҳаво транспортида йўловчи ташиш хизматлари ўртача 5,4 фоизга арзонлашган.

«Бу Ўзбекистон ҳаво йўлларида ички қатновлар учун эконом класс тарифларининг пасайиши билан боғлиқ бўлди», дея қайд этилган шарҳда.

Ўтган ойда мобил алоқа хизматлари нархи ўртача 2,9 фоизга ошди.

Асосий турдаги озиқ-овқатлар туркумига кирувчи сабзавотлардан бодринг 61,1 фоиз, помидор 27,1 фоиз арзонлашди. Карам 14 фоизга, картошка 1,9 фоизга, пиёз нархи 1,2 фоизга тушди. Сабзи эса 15 фоиз қимматлашди. Шу билан бирга, ўсимлик ёғи 4 фоизга, шакар нархи 2,2 фоизга ошди.

Мол ва қўй гўшти нархлари 0,8 фоиз, парранда гўштида 0,3-0,5 фоиз кўтарилди. Бундан ташқари, тухум 4 фоиз, гуруч 0,5 фоиз, хом сут 0,2 фоиз арзонлашди.